صحافی اور میزبان ارشاد بھٹی نے اداکارہ میرا کے ایک حالیہ انٹرویو پر ہونے والی تنقید کے بعد خاموشی توڑتے ہوئے کہا ہے کہ انہیں لوگوں کی رائے سے کوئی فرق نہیں پڑتا۔
ارشاد بھٹی کے مطابق کچھ دوست ایسے ہیں کہ میں کچھ بھی کر لوں انہوں نے مجھ سے محبت ہی کرنی ہوتی ہے ان کی تو مجھے پرواہ نہیں ہے اور کچھ ایسے ہیں جن کو بس ایک موضوع چاہیے لیکن مجھے ان کی بھی پرواہ نہیں ہے۔
یہ بھی پڑھیں: نامناسب اور ذاتی سوالات پر اداکارہ میرا ارشاد بھٹی کا پوڈکاسٹ چھوڑ کر چلی گئیں
ان کا کہنا تھا کہ مجھ پر وہ لوگ بھی تنقید کررہے ہیں جن کو میں جانتا ہوں کہ ان کا خواتین کے حوالے سے کیا ماضی رہا ہے۔ انہوں نے سوال اٹھایا کہ میں حیران ہوں کہ کیا سوال پوچھنا جرم ہے؟ ہم کیوں ہر چیز کو خاتون اور مرد کے خانے میں فٹ کر دیتے ہیں؟ مردوں کی کوئی عزت نہیں؟ مرد ہراسمنٹ نہیں محسوس کر سکتے؟ کیا خاتون سے سوال پوچھنا جرم ہے؟ کیا میں نے بدتمیزی سے سوال پوچھا ہے؟ کیا میرا سے یہ سوال کرنا نہیں بنتے تھے؟ کیا پوری دنیا میں اس طرح سوال نہیں پوچھے جاتے؟
View this post on Instagram
ارشاد بھٹی نے مزید کہا کہ میں حیران ہوں کہ وہ لوگ بھی باتیں کر رہے ہیں جنہوں نے کلثوم نواز اور مریم نواز کے گھر کے اندر گھس کر ان کا مذاق اڑایا ہے اور وہ بھی بات کر رہے ہیں جو عمران خان کی شادیوں اور ان کی بہنوں سے متعلق بات کر رہے تھے لیکن مجھے آپ کی رائے کی پرواہ نہیں۔
آخر میں انہوں نے کہا کہ کچھ لوگوں نے پورا پوڈ کاسٹ نہیں سنا لیکن فتوے جاری کر دیے ہیں۔
یہ بھی پڑھیں: شان شاہد اور میرا کی جوڑی فلم ’سائیکو‘ میں ایک بار پھر جلوہ گر ہوگی
واضح رہے کہ داکارہ میرا اپنی آنے والی فلم ’سائیکو‘ کی تشہیر کے سلسلے میں پوڈکاسٹ میں شریک ہوئیں تاہم جاری کیے گئے ٹریلر میں دیکھا جا سکتا ہے کہ میزبان کی جانب سے کیے گئے بیشتر سوالات اداکارہ کی ذاتی زندگی اور ماضی میں وائرل ہونے والی ویڈیوز سے متعلق تھے۔
دورانِ گفتگو میرا نے متعدد بار میزبان کو فلم کی پروموشن تک گفتگو محدود رکھنے کی درخواست کی لیکن سوالات کا رخ مسلسل ان کی نجی زندگی کی جانب ہی رہا۔ ٹریلر کے اختتام پر اداکارہ کو مسکراتے ہوئے میزبان کا شکریہ ادا کرتے اور انٹرویو ادھورا چھوڑ کر رخصت ہوتے دیکھا جا سکتا ہے۔
سوشل میڈیا پر اس ٹریلر کے منظرعام پر آنے کے بعد صارفین کی جانب سے ملے جلے ردعمل کا اظہار کیا جا رہا ہے۔ متعدد افراد نے میزبان کے سوالات کو غیر مناسب قرار دیا۔
