پاکستان سپر لیگ (پی ایس ایل) کے 11ویں سیزن کے 31ویں میچ میں ملتان سلطانز نے اسٹیو اسمتھ کی شاندار بیٹنگ کی بدولت راولپنڈیز کو 6 وکٹوں سے شکست دے کر پوائنٹس ٹیبل پر اپنی دوسری پوزیشن مزید مستحکم کرلی ہے۔
نیشنل بینک اسٹیڈیم میں کھیلے گئے اس مقابلے میں راولپنڈیز کے کپتان محمد رضوان نے ٹاس جیت کر پہلے بیٹنگ کا فیصلہ کیا جو آغاز میں سودمند ثابت نہ ہوا کیونکہ اوپنر شاہ زیب خان صفر اور یاسر خان صرف 4 رنز بنا کر جلد پویلین لوٹ گئے۔
یہ بھی پڑھیں: پی ایس ایل 11: پشاور زلمی نے کوئٹہ گلیڈی ایٹرز کو 118 رنز سے شکست دے دی
کپتان محمد رضوان نے 26 اور سیم بلنگز نے 29 رنز بنا کر اننگز کو سہارا دیا، تاہم آخری اوورز میں ڈیرل مچل کے ناقابلِ شکست 58 رنز اور ڈیان فوریسٹر کی محض 15 گیندوں پر 37 رنز کی دھواں دھار اننگز نے راولپنڈیز کا مجموعہ 4 وکٹوں پر 166 رنز تک پہنچا دیا۔
ملتان سلطانز کی جانب سے محمد عمران، پیٹر سڈل، عرفات منہاس اور محمد وسیم جونیئر نے ایک ایک وکٹ حاصل کی۔
167 رنز کے ہدف کے تعاقب میں ملتان سلطانز کے بلے بازوں نے پراعتماد آغاز کیا، بالخصوص آسٹریلوی اسٹار اسٹیو اسمتھ نے راولپنڈیز کے باؤلرز کی ایک نہ چلنے دی اور 31 گیندوں پر 56 رنز کی جارحانہ اننگز کھیل کر میچ کا رخ اپنی ٹیم کی طرف موڑ دیا۔
یہ بھی پڑھیں: پی ایس ایل 11: راولپنڈیز کو مسلسل 7ویں ناکامی کا سامنا، لاہور قلندرز نے 75رنز سے شکست دیدی
صاحبزادہ فرحان اور شان مسعود نے 20، 20 رنز بنا کر ان کا ساتھ دیا جبکہ کپتان ایشٹن ٹرنر نے 21 گیندوں پر 37 رنز کی ذمہ دارانہ اننگز کھیل کر ٹیم کو 19 ویں اوور میں ہی فتح دلا دی۔ راولپنڈیز کی جانب سے آصف آفریدی نے 2 وکٹیں حاصل کیں لیکن وہ اپنی ٹیم کو شکست سے نہ بچا سکے۔
اس ہار کے ساتھ ہی راولپنڈیز کی ٹیم ٹورنامنٹ میں مسلسل 8ویں شکست کے بعد پلے آف کی دوڑ سے باضابطہ طور پر باہر ہوگئی ہے، جبکہ ملتان سلطانز 12 پوائنٹس کے ساتھ پلے آف کے لیے مضبوط پوزیشن میں آگئی ہے۔
