ممبئی کے علاقے ورلی میں سیاسی ریلی کے باعث شدید ٹریفک جام پر ایک خاتون نے مہاراشٹر کے وزیر آبی وسائل ’گریش مہاجن‘ اور پولیس اہلکاروں کیخلاف سخت احتجاج کیا، جس کی ویڈیو سوشل میڈیا پر وائرل ہوگئی۔
یہ صورتحال حکمراں جماعت بھارتیہ جنتا پارٹی کی جانب سے نکالی گئی احتجاجی ریلی کے دوران پیش آئی، جو مہایوتی اتحاد کے تحت منعقد کی گئی تھی۔ ریلی اپوزیشن اتحاد مہا وکاس اگھاڑی کے خلاف نکالی گئی تھی۔
یہ بھی پڑھیے: اسلام آباد: ریڈ زون اور مختلف شاہراہوں پر ٹریفک ایڈوائزری جاری
رپورٹس کے مطابق ریلی میں تاخیر کے باعث علاقے میں شدید ٹریفک جام ہوگیا۔ اسی دوران ایک مقامی خاتون، جو اپنے بچے کو اسکول سے لینے جا رہی تھیں، کئی گھنٹوں تک ٹریفک میں پھنس گئیں۔ شدید غصے میں وہ اپنی گاڑی سے نکلیں اور مارچ کے درمیان پہنچ کر وزیر ’گریش مہاجن‘ سے تلخ انداز میں بات کی۔
خاتون نے عوام کو ہونے والی پریشانی پر سوال اٹھاتے ہوئے مظاہرین سے منتشر ہونے کا مطالبہ کیا اور کہا ’یہاں سینکڑوں لوگ انتظار کر رہے ہیں، وہاں خالی میدان موجود ہے‘۔
انہوں نے ممبئی پولیس پر بھی برہمی کا اظہار کیا۔ جب پولیس اہلکار مداخلت کے لیے آگے بڑھے تو خاتون نے اعلیٰ افسران سے بات کرنے کا مطالبہ کیا۔
بعد ازاں پولیس اہلکار خاتون کو سڑک کے کنارے لے گئے اور ان کا مؤقف سننے کی کوشش کی۔
واقعے کی ویڈیو سامنے آنے کے بعد سوشل میڈیا پر ٹریفک نظم و نسق اور سیاسی ریلیوں کے باعث عوامی مشکلات پر تنقید کی گئی ہے۔
