اسلام آباد میں ٹریفک پولیس نے شہریوں کے لیے نئی ایڈوائزری جاری کر دی ہے جس کے مطابق ریڈ زون میں صرف سرکاری گاڑیوں کے داخلے کی اجازت ہوگی جبکہ عام ٹریفک کے لیے داخلہ بند رہے گا۔
یہ بھی پڑھیں: امریکا ایران مذاکرات پاکستان کے لیے اعزاز، عالمی اسلامی کانفرنس 20 اپریل کو اسلام آباد میں ہوگی، مولانا طاہر اشرفی
ایڈوائزری کے مطابق کشمیر چوک سے سرینا چوک اور سری نگر ہائی وے کی طرف آمدورفت مکمل طور پر بند رہے گی۔ اسی طرح بھارہ کہو سے آنے والے شہری کشمیر چوک کے راستے کلب روڈ استعمال کرتے ہوئے شہر میں داخل ہو سکیں گے، جبکہ مری روڈ سے آنے والے شہری بھی کلب روڈ کے ذریعے بھارہ کہو کی طرف جا سکیں گے۔
اعلامیے میں بتایا گیا ہے کہ سیونتھ ایونیو پل سے سرینا چوک تک سری نگر ہائی وے بند رہے گی تاہم زیرو پوائنٹ سے سیونتھ ایونیو فلائی اوور تک دونوں جانب کی سڑکیں ٹریفک کے لیے کھلی رہیں گی۔ شہری سیونتھ ایونیو انٹر سیکشن سے G-6، G-7 اور چاند تارہ چوک کی طرف سفر کر سکتے ہیں۔
علاوہ ازیں فیصل ایونیو اور مارگلہ روڈ ٹریفک کے لیے کھلے رہیں گے۔ نواز چوک سے F-7 مرکز، خیابان چوک سے بلیو ایریا جبکہ ناظم الدین روڈ سے F-6 اور F-7 اور فضل حق روڈ سے G-6 اور G-7 کی طرف آمدورفت جاری رہے گی۔
مزید پڑھیے: پاکستان محض سہولتکار نہیں بلکہ براہِ راست ثالث بن کر ابھرا ہے، امریکی ماہرین خارجہ امور
ٹریفک پولیس نے شہریوں سے درخواست کی ہے کہ وہ متبادل راستوں کا استعمال کرتے ہوئے سفر کریں اور ٹریفک ایڈوائزری پر عمل کریں۔ مزید معلومات کے لیے شہری اسلام آباد ٹریفک پولیس کے واٹس ایپ چینل، سوشل میڈیا پیجز اور آئی ٹی پی FM 92.4 سے رہنمائی حاصل کر سکتے ہیں۔
