پاکستانی فلم اور ٹیلی ویژن کی معروف اداکارہ میرا اس وقت اپنی آنے والی فلم سائیکو کے باعث خبروں کی زینت بنی ہوئی ہیں جو عیدالاضحیٰ 2026 پر ریلیز کی جائے گی۔ اسی دوران وہ ارشاد بھٹی اور ریحان طارق کے متنازع پوڈکاسٹ میں دیے گئے انٹرویو کے باعث بھی سوشل میڈیا پر زیرِ بحث ہیں، جہاں ان سے سخت سوالات کیے گئے تھے۔ بعد ازاں پوڈکاسٹر ارساد بھٹی نے اپنے رویے پر میرا سے معذرت بھی کی تھی۔
حال ہی میں میرا نے ایک پوڈ کاسٹ میں شرکت کی جہاں انہوں نے اس تنازعہ پر اپنے خیالات کا اظہار کیا۔ پوڈکاسٹ میں میزبان نے اس سے سوال کیا کہ کیا یہ انٹرویو ’پیڈ‘ تھا؟ جس پر میرا نے کہا کہ وہ بطور مہمان شریک ہوئیں اور ان کے مطابق میزبان نے ان کی فلم کی بہترین پروموشن کی۔
انہوں نے مزید کہا کہ اس معاملے پر وہ کوئی تبصرہ نہیں کرنا چاہتیں اور نہ ہی ان کا کسی سے کوئی شکوہ ہے کیونکہ ان کی فلم جلد ریلیز ہونے والی ہے۔ اور ان کی خواہش ہے کہ لوگ عیدالاضحیٰ پر ان کی فلم دیکھیں اور اپنی رائے کا اظہار کریں ان کے لیے یہی سب سے اہم ہے۔
واضح رہے کہ حال ہی میں صحافی اور میزبان ارشاد بھٹی نے اداکارہ میرا کا انٹرویو کیا تھا جس میں میزبان کی جانب سے کیے گئے بیشتر سوالات اداکارہ کی ذاتی زندگی اور ماضی میں وائرل ہونے والی ویڈیوز سے متعلق تھے۔
یہ بھی پڑھیں: ’کیا سوال پوچھنا جرم ہے؟‘، اداکارہ میرا سے انٹرویو کے بعد ہونے والی تنقید پر ارشاد بھٹی نے خاموشی توڑ دی
دورانِ گفتگو میرا نے متعدد بار میزبان کو فلم کی پروموشن تک گفتگو محدود رکھنے کی درخواست کی لیکن سوالات کا رخ مسلسل ان کی نجی زندگی کی جانب ہی رہا۔ ٹریلر کے اختتام پر اداکارہ کو مسکراتے ہوئے میزبان کا شکریہ ادا کرتے اور انٹرویو ادھورا چھوڑ کر رخصت ہوتے دیکھا جا سکتا ہے۔
سوشل میڈیا پر اس ٹریلر کے منظرعام پر آنے کے بعد صارفین کی جانب سے ملے جلے ردعمل کا اظہار کیا جا رہا ہے۔ متعدد افراد نے میزبان کے سوالات کو غیر مناسب قرار دیا۔ اس کے بعد ارشاد بھٹی نے وضاحتی بیان جاری کیا اور میرا سے معافی بھی مانگی۔
