ٹرمپ مقبولیت کی سب سے نچلی سطح پر جاگرے، وسط مدتی انتخابات سے قبل ریپبلکنز کو بڑا دھچکا

آئندہ امریکی وسط مدتی انتخابات سے قبل ہونے والے مختلف عوامی جائزوں میں صدر ڈونلڈ ٹرمپ کی مقبولیت میں کمی اور معیشت، امیگریشن و ایران پالیسیوں پر بڑھتی عوامی ناپسندیدگی سامنے آئی ہے، جس کے نتیجے میں حکمران ریپبلکن پارٹی میں تشویش کی لہر دوڑ گئی ہے۔

Reuters-Ipsos، AP-NORC اور NBC News کے مختلف سرویز کے مطابق صدر ٹرمپ کی مجموعی مقبولیت 33 سے 36 فیصد کے درمیان ہے، جو ان کی اب تک کی کم ترین سطح بتائی جا رہی ہے۔

معیشت پر عوامی رائے

AP-NORC کے مطابق 70 فیصد امریکی شہری معیشت کو ’خراب‘ قرار دیتے ہیں اور سمجھتے ہیں کہ ملک غلط سمت میں جا رہا ہے۔ سروے کے مطابق معیشت کے حوالے سے ٹرمپ کی کارکردگی کی منظوری کی شرح 30 فیصد رہ گئی ہے، جو گزشتہ ماہ مارچ میں 38 فیصد تھی۔

زندگی کے بڑھتے اخراجات کے حوالے سے صرف 23 فیصد افراد نے اطمینان ظاہر کیا، جبکہ 76 فیصد نے عدم اطمینان کا اظہار کیا۔

امیگریشن پالیسی پر امریکیوں کی رائے

Reuters-Ipsos کے ایک سروے کے مطابق ٹرمپ کی سخت امیگریشن اور ڈیپورٹیشن پالیسیز ریپبلکنز کے لیے نقصان دہ ثابت ہو سکتی ہیں۔ 52 فیصد امریکیوں نے کہا کہ وہ ایسے امیدوار کی حمایت شاید نہ کرسکیں جو ٹرمپ کی پالیسیوں کی حمایت کرتا ہو، جبکہ 42 فیصد نے حمایت بڑھانے کا عندیہ دیا۔

یہ بھی پڑھیے ٹرمپ کی مقبولیت میں نمایاں کمی، 59 فیصد امریکی عوام غیر مطمئن، سروے

آزاد ووٹرز میں یہ فرق مزید نمایاں ہے، جہاں 57 فیصد ٹرمپ مخالف امیدواروں کو ترجیح دیتے ہیں۔

 ایران پالیسی اور خارجہ امور پر امریکی کیا سوچتے ہیں؟

ایران سے متعلق پالیسی پر بھی عوامی رائے منقسم ہے۔ رپورٹ کے مطابق 67 فیصد امریکی ٹرمپ کے ایران کے ساتھ جنگی پالیسی کے مخالف ہیں، جبکہ صرف ایک تہائی حمایت کرتے ہیں۔ ڈیموکریٹس اور آزاد ووٹرز میں مخالفت کی شرح کہیں زیادہ ہے، جبکہ ریپبلکن ووٹرز کی اکثریت اس کی حمایت کرتی ہے۔

مجموعی سیاسی رجحانات

NBC News کے مطابق ٹرمپ کی مجموعی کارکردگی سے 37 فیصد عوام مطمئن ہیں جبکہ 63 فیصد ناراض ہیں، جن میں سے 50 فیصد نے شدید ناپسندیدگی ظاہر کی ہے۔

اس کے باوجود ریپبلکن ووٹرز کی بڑی تعداد اب بھی صدر کی حمایت جاری رکھے ہوئے ہے، تاہم ان کی معیشت سے متعلق حمایت میں معمولی کمی دیکھی گئی ہے۔

یہ بھی پڑھیے ڈونلڈ ٹرمپ کی مقبولیت میں تاریخی کمی، معاشی پالیسیاں عوامی غصے کی زد میں

سروے میں یہ بھی سامنے آیا کہ صرف ایک تہائی امریکیوں کا خیال ہے کہ ملک درست سمت میں جا رہا ہے، جبکہ دو تہائی اس کے برعکس رائے رکھتے ہیں۔

اہم عوامی ترجیحات

عوام کی ترجیحی مسائل میں معیشت سرفہرست ہے، جسے 29 فیصد افراد نے سب سے اہم مسئلہ قرار دیا۔ اس کے بعد جمہوریت کو لاحق خطرات (24 فیصد)، صحت کی سہولیات (12 فیصد) اور جرائم و سلامتی (10 فیصد) شامل ہیں۔

ایران کے حوالے سے فوجی مؤقف

اکثریت یعنی 61 فیصد امریکیوں نے کہا کہ امریکا کو ایران کے خلاف مزید فوجی کارروائی نہیں کرنی چاہیے۔

شناختی نظام کی حمایت

تاہم ٹرمپ اور ریپبلکن پارٹی کو اس وقت زیادہ حمایت اس معاملے میں حاصل ہے کہ ووٹرز کو شناختی کارڈ دکھانے اور شہریت کے ثبوت کی شرط عائد کی جائے۔ 75 فیصد امریکی حکومت کے جاری کردہ باتصویر شناختی کارڈ کی حمایت کرتے ہیں جبکہ 61 فیصد کا کہنا ہے کہ اس میں شہریت کا ثبوت بھی شامل ہونا چاہیے۔