حیدرآباد کے علاقے پھلیلی میں شادی کی تقریب کے دوران افسوسناک حادثہ پیش آیا ہے، جہاں 3 بچے کرنٹ لگنے سے جاں بحق ہوگئے۔
پولیس کے مطابق بچے اپنے رشتہ دار کی شادی میں شرکت کے لیے آئے تھے اور گھر کی چھت پر سو رہے تھے کہ اسی دوران چھت کے قریب سے گزرنے والی ہائی وولٹیج بجلی کی تاروں سے کرنٹ لگ گیا۔
یہ بھی پڑھیں:کھمبے پر اٹکی پتنگ پکڑنے کی کوشش میں نوجوان کرنٹ لگنے سے جاں بحق
حادثے میں جاں بحق ہونے والے بچوں کی عمریں 10، 12 اور 14 سال بتائی گئی ہیں، جن میں 2 سگے بھائی بھی شامل ہیں۔ واقعے کے بعد علاقے میں کہرام مچ گیا اور شادی کی خوشی ماتم میں بدل گئی۔
دوسری جانب حیسکو کے ترجمان نے بتایا ہے کہ پھلیلی سب ڈویژن میں پیش آنے والا یہ واقعہ کرنٹ لگنے سے ہوا، تاہم جائے وقوعہ پر بجلی کی تاریں ٹوٹی ہوئی نہیں تھیں۔ ان کے مطابق امکان ہے کہ بچے تاروں کے انتہائی قریب موجود تھے یا انہیں چھونے کے باعث کرنٹ لگا۔
ترجمان نے مزید کہا کہ علاقے میں غیرقانونی تعمیرات کے باعث بجلی کی تاریں گھروں کی چھتوں اور دیواروں کے بہت قریب آ چکی ہیں، جبکہ ٹنڈو طیب کے علاقے میں رہائشیوں کو اس حوالے سے پہلے بھی نوٹس جاری کیے جا چکے ہیں۔
