ایران کے حسین وفائی نے مسلسل 9 فریمز جیت کر رواں سال کی ورلڈ اسنوکر چیمپئن شپ میں کوالیفائر کی حیثیت سے دوسرے راؤنڈ تک رسائی حاصل کرنے والے پہلے کھلاڑی بننے کا اعزاز حاصل کر لیا ہے۔
انہوں نے چین کے سی جیاہوئی کو 3-10 سے شکست دی اور اب ان کا مقابلہ ہفتہ کے روز عالمی نمبر ون اور 2019 کے عالمی چیمپئن جڈ ٹرمپ سے ہوگا۔
یہ بھی پڑھیں: بھارت کا ویزا دینے سے انکار، پاکستانی اسنوکرز ورلڈ چیمپیئن میں شرکت سے محروم
عالمی درجہ بندی میں 32ویں نمبر پر موجود حسین وفائی نے ایک سینچری سمیت 50 سے زائد کے 7 مزید بریکس کھیلتے ہوئے شاندار کارکردگی کا مظاہرہ کیا۔
31 سالہ حسین وفائی نے بدھ کو شیفیلڈ کے کروسیبل تھیٹر میں کھیلے گئے پہلے سیشن میں 3-1 کے خسارے سے واپسی کرتے ہوئے 6-3 کی برتری حاصل کی، جس دوران ان کا بہترین بریک 105 رہا۔
Hossein Vafaei reels off nine frames on the bounce to advance! 🙌
The Iranian is the first qualifier through to round two.#WorldChampionship pic.twitter.com/No2CXGvHoF
— WST (@WeAreWST) April 23, 2026
وہ 2023 اور 2025 میں بھی اسی مرحلے تک پہنچ چکے ہیں اور اب پہلی بار کوارٹر فائنل میں رسائی کے خواہشمند ہیں۔
وفائی کا کہنا تھا کہ انہیں اپنے ملک سے بھرپور حمایت مل رہی ہے۔ ’اسی لیے میں ان کے لیے لڑ رہا ہوں۔ میں صرف انہیں خوش دیکھنا چاہتا ہوں۔‘
انہوں نے اپنے چینی حریف سی جیاہوئی کی تعریف کرتے ہوئے انہیں ایک بہترین کھلاڑی قرار دیا۔
مزید پڑھیں: ایشین انڈر 21 اسنوکر چیمپیئن شپ، پاکستان کے کیوئسٹ نے ٹائٹل جیت لیا
’۔۔۔اس لیے ان کے خلاف جیت میرے لیے ایک شاندار کامیابی ہے، شاید کوالیفائرز کھیلنے کے بعد میں زیادہ پراعتماد تھا۔‘
یاد رہے کہ 2022 میں حسین وفائی نے شوٹ آؤٹ ٹورنامنٹ جیت کر رینکنگ ٹائٹل حاصل کرنے والے پہلے ایرانی کھلاڑی ہونے کا اعزاز حاصل کیا تھا، جبکہ اگلے برس وہ مختصر عرصے کے لیے ٹاپ 16 میں بھی شامل رہے۔
انہوں نے شیفیلڈ میں اپنے ابتدائی میچ سے قبل کہا تھا کہ فروری میں اپنے ملک میں شروع ہونے والے تنازع کے باعث انہیں توجہ مرکوز کرنے میں مشکلات پیش آ رہی ہیں۔
