بنگلہ دیش میں مختلف سیاسی جماعتوں سے تعلق رکھنے والے کئی سینکڑوں رہنماؤں اور کارکنان نے نیشنل سٹیزن پارٹی (این سی پی) میں شمولیت اختیار کرلی ہے۔
این سی پی میں شمولیت اختیار کرنیوالی نمایاں شخصیات میں سابق جوبودل رہنما محمد اسحاق سرکار، شیرِ بنگلہ اے کے فضل الحق کی نواسی فرسامن حق اقبال اور معروف کانٹینٹ کریئیٹر نورالزمان کافی شامل ہیں۔
نئے ارکان کا باضابطہ خیرمقدم ڈھاکہ کے علاقے کاکرائل میں واقع انسٹی ٹیوشن آف ڈپلومہ انجینیئرز کے آڈیٹوریم میں منعقدہ تقریب کے دوران کیا گیا، جس میں این سی پی کے کنوینر ناہید اسلام سمیت دیگر سینیئر رہنما بھی موجود تھے۔
یہ بھی پڑھیں: بنگلا دیش: شفیق الرحمان قائد حزب اختلاف، عبداللہ طاہر ڈپٹی اپوزیشن لیڈر، ناہید اسلام چیف وہپ نامزد
تقریب سے خطاب کرتے ہوئے این سی پی کے کنوینر اور اپوزیشن کے چیف وہپ ناہید اسلام نے کہا کہ ان کی جماعت ملک کو عوامی امنگوں کے مطابق تبدیلی اور اصلاحات کی راہ پر گامزن کرنا چاہتی ہے۔
انہوں نے کہا کہ گزشتہ انتخابات کو ملک میں بڑی تبدیلی کے موقع کے طور پر پیش کیا گیا تھا، تاہم ان کے بقول منتخب حکومت نے اقتدار سنبھالتے ہی عوامی مینڈیٹ کو مسترد کردیا۔
انہوں نے دعویٰ کیا کہ آئینی اصلاحات سمیت وعدہ کی گئی تبدیلیوں کو بتدریج ترک کردیا گیا، جبکہ انتخابات محض اقتدار کی روایتی منتقلی تک محدود ہوکر رہ گئے۔
এনসিপিতে যোগদান করেছেন ইসহাক সরকার, ফেরসান খান ইকবাল, নুরুজ্জামান কাফি ও মহিউদ্দিন রনি pic.twitter.com/5wGf6NiS5k
— Ekhon TV (@ekhon_tv) April 24, 2026
ناہید اسلام نے ریاستی اداروں کی مبینہ سیاسی وابستگی پر تنقید کرتے ہوئے کہا کہ بینک لوٹنے والے عناصر کو دوبارہ سرگرم ہونے کی اجازت دی جا رہی ہے، جبکہ اداروں کو جماعتی کنٹرول میں لایا
جا رہا ہے۔
ان کا کہنا تھا کہ جامعات میں بھی طاقت کے استعمال اور غلبے کی سیاست دوبارہ سر اٹھا رہی ہے۔
انہوں نے خبردار کیا کہ اگر فسطائیت، کسی نئی آمرانہ طرزِ حکومت یا پرانے آمرانہ نظام کو برقرار رکھنے کی کوششیں جاری رہیں تو عوام ایک بار پھر متحد ہوکر میدان میں آئیں گے۔
مزید پڑھیں: شیخ حسینہ کے خلاف مہم کی قیادت کرنے والا طالب علم رہنما ناہید اسلام کون ہے؟
ان کے مطابق عوام نیشنل سٹیزن پارٹی کے پلیٹ فارم پر جمع ہوں گے، اور اس تحریک پر عوام کا اعتماد پارٹی کے قیام سے قبل ہی عوامی احتجاج کے دوران ظاہر ہوچکا ہے۔
آئندہ بلدیاتی انتخابات کا حوالہ دیتے ہوئے ناہید اسلام نے کہا کہ نوجوان ان انتخابات میں فیصلہ کن کردار ادا کریں گے اور یہ رفتار این سی پی کی حمایت سے مزید مضبوط ہوگی۔
