زمبابوے کی ویمنز کرکٹ ٹیم 29 اپریل کو اپنے پہلے دورہ پاکستان کے لیے کراچی پہنچے گی جو دونوں ممالک میں خواتین کرکٹ کے فروغ کے لیے ایک اہم پیشرفت قرار دی جا رہی ہے۔
مہمان ٹیم پاکستان کے خلاف 3 ایک روزہ میچز (ون ڈے) اور بعد ازاں ٹی20 سیریز کھیلے گی جبکہ تمام میچز نیشنل بینک اسٹیڈیم کراچی میں منعقد ہوں گے۔
مزید پڑھیں: ہماری کوشش ہے کہ مستقبل میں ویمنز کرکٹ ورلڈ کپ پاکستان میں منعقد ہو، محسن نقوی
پاکستان ویمنز ٹیم کی قیادت فاطمہ ثنا کریں گی اور یہ ون ڈے سیریز آئی سی سی ویمنز چیمپئن شپ 29-2025 کا حصہ ہے۔
پاکستان اس وقت چیمپیئن شپ پوائنٹس ٹیبل پر 2 پوائنٹس کے ساتھ 5ویں پوزیشن پر موجود ہے۔
سیریز کی تفصیلات
ون ڈے سیریز کے میچز 4، 6 اور 9 مئی کو کھیلے جائیں گے جن کا آغاز سہ پہر 3:30 بجے ہوگا۔ دونوں ٹیمیں 30 اپریل سے 3 مئی تک کراچی میں ٹریننگ سیشنز میں حصہ لیں گی۔
ون ڈے سیریز کے بعد 3 ٹی20 میچز 12، 14 اور 15 مئی کو اسی مقام پر کھیلے جائیں گے، جن کا آغاز شام 7:30 بجے ہوگا۔
پاکستان ویمنز اسکواڈ
15 رکنی قومی اسکواڈ میں تجربہ کار اور نئے کھلاڑیوں کا امتزاج شامل ہے جبکہ مومنہ ریاست کو پہلی بار ٹیم میں شامل کیا گیا ہے۔ دیگر نمایاں کھلاڑیوں میں عالیہ ریاض، عائشہ ظفر، ڈیانا بیگ، منیبہ علی، نَشرا سندھو، سدرہ امین اور صدف شمس شامل ہیں۔
انتظامی و معاون عملہ
ٹیم کے ساتھ کوچنگ اور معاون عملے میں وہاب ریاض (ہیڈ کوچ/مینٹور)، عبد الرحمان (اسپن بولنگ کوچ)، عمید آصف (فاسٹ بولنگ کوچ)، عمران فرحت (بیٹنگ کوچ) سمیت دیگر اسٹاف شامل ہے جو ٹیم کی تیاریوں میں مصروف ہیں۔
مزید پڑھیں: ویمنز کرکٹ ورلڈ کپ: جنوبی افریقہ اور انڈیا کا فائنل میں مقابلہ تاریخ ساز کیوں؟
حکام کے مطابق یہ سیریز نہ صرف دونوں ٹیموں کے لیے اہم ہے بلکہ پاکستان میں خواتین کرکٹ کے فروغ اور بین الاقوامی کھیلوں کی سرگرمیوں کی بحالی میں بھی اہم کردار ادا کرے گی۔
