وزیر اعلیٰ خیبرپختونخوا سہیل آفریدی نے قومی اسمبلی میں اپوزیشن لیڈر محمود خان اچکزئی کی رہائش گاہ پر اہم ملاقات کی ہے۔
ملاقات سے متعلق جاری کردہ ایک اعلامیے کے مطابق عمران خان کی ہدایت پر ہونیوالی اس ملاقات میں ملک کی مجموعی سیاسی صورتحال سمیت اہم قومی امور پر تفصیلی تبادلہ خیال کیا گیا۔
یہ بھی پڑھیں: پی ٹی آئی کو 3 سالوں سے مسلسل دیوار سے لگایا جارہا ہے، سہیل آفریدی
ملاقات میں علامہ ناصر عباس، اسد قیصر، مصطفیٰ نواز کھوکھر، حسین احمد یوسفزئی اور خالد یوسف چوہدری بھی شریک تھے۔
شرکا نے عمران خان کی صحت، علاج معالجے، قانونی دستاویزات پر دستخط سے روکے جانے اور انصاف تک رسائی میں درپیش رکاوٹوں پر تشویش کا اظہار کیا۔
اجلاس میں آئندہ بجٹ، این ایف سی ایوارڈ، صوبائی حقوق اور ملک کی مجموعی سیاسی صورتحال پر بھی غور کیا گیا، جبکہ سیاسی انتقام پر مبنی مقدمات کے حوالے سے بھی تفصیلی گفتگو ہوئی۔
مزید پڑھیں: وزیراعلیٰ خیبر پختونخوا کا بغیر مشاورت دورہ کشمیر و لاہور، کیا اچکزئی مائنس ہو گئے؟
اعلامیے کے مطابق ملاقات کے دوران قومی مسائل کے حل کے لیے مشترکہ حکمت عملی اپنانے پر اتفاق کیا گیا۔
شرکا نے اپوزیشن جماعتوں کے درمیان رابطوں کو مزید مضبوط بنانے اور آئندہ بجٹ میں عوام کے معاشی حقوق کے تحفظ کے لیے مؤثر حکمت عملی ترتیب دینے پر بھی زور دیا۔
