بنگلہ دیش میں دہشتگردی کے ممکنہ خطرے کے پیش نظر ملک بھر کے تمام ایئرپورٹس پر سیکیورٹی سخت کر دی گئی ہے، جن میں دارالحکومت ڈھاکہ کا مرکزی ایئرپورٹ بھی شامل ہے۔
بنگلہ دیشی حکام کے مطابق یہ اقدامات اہم تنصیبات پر ممکنہ عسکریت پسند حملوں سے متعلق انٹیلی جنس وارننگ کے بعد کیے گئے۔
مزید پڑھیں: بنگلہ دیش کی حساس تنصیبات پر حملوں کا خدشہ، ملک بھر میں سیکیورٹی الرٹ جاری
ایئرپورٹ اور سیکیورٹی ذرائع کا کہنا ہے کہ حساس مقامات پر نگرانی بڑھا دی گئی ہے، خاص طور پر ڈھاکہ کے مرکزی بین الاقوامی ہوائی اڈے پر سیکیورٹی سخت کردی گئی ہے۔
ذرائع کے مطابق اضافی یونیفارم اور سادہ لباس میں اہلکار تعینات کیے گئے ہیں جبکہ آنے اور جانے والے مسافروں کی اسکریننگ کے عمل کو مزید سخت کردیا گیا ہے۔
حکام کا کہنا ہے کہ یہ الرٹ گزشتہ ہفتے بنگلہ دیش پولیس ہیڈکوارٹر کی جانب سے جاری کردہ ایک وارننگ لیٹر کے بعد جاری کیا گیا، جس میں ایک کالعدم عسکریت پسند گروہ کی جانب سے ریاستی اداروں اور اہم مقامات پر مربوط حملوں کی منصوبہ بندی کا خدشہ ظاہر کیا گیا تھا۔
ممکنہ اہداف میں پارلیمنٹ، پولیس، فوجی تنصیبات، عبادت گاہیں، تفریحی مقامات اور دیگر اہم انفراسٹرکچر شامل بتائے گئے ہیں۔
حکام کے مطابق تمام ایئرپورٹس کے داخلی راستوں پر سخت نگرانی کی جا رہی ہے اور عملے کو ہدایت دی گئی ہے کہ کسی بھی مشکوک سرگرمی کی فوری اطلاع دی جائے۔ جن ہوائی اڈوں پر رات کے وقت پروازیں نہیں ہوتیں، انہیں بھی رات کے اوقات میں سیکیورٹی بڑھانے کی ہدایت دی گئی ہے۔
پولیس کے مطابق حالیہ انٹیلی جنس رپورٹس میں اشارہ دیا گیا ہے کہ کالعدم گروہ سے منسلک بعض افراد آپس میں مسلسل رابطے میں ہیں اور مختلف طریقوں سے حملوں کی منصوبہ بندی کر سکتے ہیں۔
مزید پڑھیں: بنگلہ دیش نے سرحدی سیکیورٹی مزید سخت کر دی، دیناج پور میں نئی بارڈر چوکی قائم
قانون نافذ کرنے والے اداروں کے مطابق کسی بھی ممکنہ واقعے کی روک تھام کے لیے ملک بھر میں انٹیلی جنس رابطہ کاری اور نگرانی مزید سخت کردی گئی ہے۔
