بنگلہ دیش نے سرحدی علاقوں میں اسمگلنگ اور دیگر جرائم کے سدباب کے لیے سیکیورٹی مزید مضبوط کرتے ہوئے ضلع دیناج پور کے سرحدی علاقے میں نئی بارڈر چوکی قائم کر دی ہے۔
بنگلہ دیش بارڈر گارڈز (بی جی بی) کے مطابق بیرال اپازیلا کے علاقے موچوشا میں قائم کی گئی نئی بارڈر آؤٹ پوسٹ کا افتتاح بریگیڈیئر جنرل اے ایس ایم ناصر نے کیا، جہاں تقریب کے دوران قومی پرچم بھی لہرایا گیا۔ یہ چوکی دیناج پور بٹالین (42 بی جی بی) کے تحت 21ویں آؤٹ پوسٹ ہے۔
تقریب سے خطاب کرتے ہوئے بریگیڈیئر جنرل ناصر نے کہا کہ بی جی بی اہلکار مشکل حالات میں بھی چوبیس گھنٹے ملکی سرحدوں کی حفاظت کر رہے ہیں اور غیر قانونی سرگرمیوں کو روکنے کے لیے ہمہ وقت مستعد ہیں۔ انہوں نے بتایا کہ سرحدی علاقوں میں ایندھن اور خوردنی تیل کی اسمگلنگ روکنے کے لیے خصوصی چیک پوسٹس اور انٹیلی جنس نگرانی بھی بڑھا دی گئی ہے۔
یہ بھی پڑھیں:سیاسی بنیادوں پر قائم مقدمات کے خاتمے اور عدالتی اصلاحات کے لیے بنگلہ دیشی حکومت سرگرم
حکام کے مطابق نئی چوکی زیرو لائن کے قریب قائم کی گئی ہے تاکہ منشیات کی اسمگلنگ، انسانی اسمگلنگ بالخصوص خواتین اور بچوں کی غیر قانونی نقل و حرکت، اور دراندازی جیسے جرائم پر قابو پایا جا سکے۔
بی جی بی حکام کا کہنا ہے کہ اس نئی بارڈر چوکی سے دیناج پور بٹالین کے زیر نگرانی تقریباً 99 کلومیٹر طویل سرحدی علاقے میں سیکیورٹی مزید مؤثر ہو گی اور سرحدی خطے میں استحکام کو فروغ ملے گا۔
