عمران خان کے خلاف وکیل کے قتل کا مقدمہ درج، بھٹو کی پھانسی کی وجہ بننے والی دفعہ بھی شامل

سپریم کورٹ کے سینئر وکیل عبدالرزاق شر کے قتل کا مقدمہ درج کرلیا گیا جس میں پاکستان تحریک انصاف کے چیئرمین عمران خان کو نامزد کیا گیا ہے۔ مقدمہ تھانہ جمیل شہید میں مقتول کے بیٹے کی مدعیت میں درج کیا گیا۔

پولیس کے مطابق چیئرمین پاکستان تحریک انصاف و سابق وزیراعظم عمران خان کو سینئر وکیل عبدالرزاق شر کے قتل کے مقدمے میں نامزد کیا گیا ہے جبکہ مقدمے میں قتل اقدام قتل، دہشت گردی کی دفعات سمیت دیگر دفعات بھی شامل کی گئی ہیں۔

سپریم کورٹ کے ایڈوکیٹ عبدالرزاق کے قتل کے خلاف وکلاء کی مختلف تنظیموں کی جانب سے عدالتی کارروائی کے بائیکاٹ کرنے کے ساتھ ساتھ تین روزہ سوگ کا بھی اعلان کیا گیا ہے۔

عبدالرزاق شر عمران خان کے خلاف سنگین غداری کے کیس میں درخواست گزار تھے۔عمران خان کے خلاف آئِین کے آرٹیکل 6 کے تحت سنگین غداری کیس میں کارروائی شروع کرنے کے حوالے سے آج سماعت بھی مقرر تھی تاہم عدالتی کارروائی کے بائیکاٹ کے سبب آج بلوچستان ہائیکورٹ میں غداری کیس کی سماعت نہ ہو سکی۔

واضح رہے کہ عبدالرزاق شر نے سابق وزیراعظم کے خلاف آئین کے آرٹیکل 5 کی خلاف ورزی و آئین کے آرٹیکل 6 سے روگردانی پر درخواست بلوچستان ہائی کورٹ میں دائر کی ہوئی تھی۔

سپریم کورٹ کے سینئر وکیل عبدالرزاق شر کو گزشتہ روز ائیر پورٹ روڈ پر عالمو چوک کے قریب نامعلوم افراد نے 15 گولیاں مار کر قتل کر دیا تھا۔

یہاں یہ بات قابل ذکر ہے کہ سابق وزیراعظم ذوالفقار علی بھٹو کو بھی اعانت جرم سے متعلق تعزیرات پاکستان کی دفعہ 109 کے تحت سزائے موت دی گئی تھی۔

سابق وزیراعظم عمران خان کے خلاف درج مقدمے کے مطابق مدعی سراج احمد نے مؤقف اختیار کیا کہ ان کے والد نے عمران خان کے خلاف ہائی کورٹ میں پیٹیشن دائر کی ہوئی ہے اور اس بات کا قوی امکان ہے کہ انہیں عمران خان اور ان کی پارٹی کے افراد نے اسی رنجش کی بنیاد پر قتل کیا۔