اسلام آباد کے سرکاری اسپتال پمز میں بانی پی ٹی آئی کی آنکھ کے علاج کا عمل مکمل کر لیا گیا، جہاں ماہرینِ چشم نے معائنہ کے بعد انہیں طبی طور پر مستحکم قرار دیا اور کامیاب ڈے کیئر طریقہ کار کے بعد ڈسچارج کر دیا گیا۔
اسلام آباد کے پاکستان انسٹی ٹیوٹ آف میڈیکل سائنسز (پمز) کی انتظامیہ نے بتایا ہے کہ بانی پاکستان تحریک انصاف کو آنکھوں کے فالو اپ علاج کے لیے 28 اپریل کو اسپتال لایا گیا، جہاں انہیں اینٹی وی ای جی ایف انٹرا ویٹریل انجیکشن کی چوتھی خوراک دی گئی۔
یہ بھی پڑھیے کیا بانی پی ٹی آئی عمران خان کی آنکھ ٹھیک ہوگئی؟
اعلامیے کے مطابق طبی طریقہ کار سے قبل مریض کی مکمل رضامندی حاصل کی گئی، جبکہ ماہرینِ چشم نے تفصیلی معائنہ کیا جس کے بعد مریض کو طبی طور پر مستحکم قرار دیا گیا۔
پمز انتظامیہ کا کہنا ہے کہ آپٹیکل کوہیرنس ٹوموگرافی (OCT) کے نتائج میں بھی بہتری دیکھی گئی۔ مزید بتایا گیا کہ مکمل آگاہی اور رضامندی کے ساتھ معیاری طبی نگرانی میں آپریشن تھیٹر میں طریقہ کار انجام دیا گیا۔
یہ بھی پڑھیے آپ نے عمران خان کو آنکھ کی بیماری سے متعلق جھوٹ کیوں بولا؟ شیر افضل مروت محمود اچکزئی و دیگر پر برس پڑے
بیان میں کہا گیا ہے کہ یہ عمل ڈے کیئر سرجری کے طور پر مکمل کیا گیا اور مریض طریقہ کار سے قبل، دوران اور بعد میں بھی مستحکم رہا۔ بعد ازاں ضروری نگہداشت، فالو اپ ہدایات اور دستاویزات فراہم کر کے مریض کو ڈسچارج کر دیا گیا۔
