نائب وزیراعظم و وزیر خارجہ سینیٹر محمد اسحاق ڈار نے آٹزم اسپیکٹرم ڈس آرڈر (ASD) کے لیے قائم کیے جانے والے سینٹر آف ایکسیلینس کے ایڈوائزری بورڈ کے اجلاس کی صدارت کرتے ہوئے اب تک ہونے والی پیشرفت کا جائزہ لیا۔
اجلاس کے دوران نائب وزیراعظم نے سینٹر کے مقام کے تعین پر اطمینان کا اظہار کیا اور متعلقہ حکام کو ہدایت کی کہ منصوبہ بندی اور ترقیاتی عمل کو تیز کیا جائے۔
انہوں نے اس بات پر زور دیا کہ سینٹر میں معیاری خدمات کی فراہمی، تربیت یافتہ ماہرین کی دستیابی، خصوصی طرز تعمیر اور بین الاقوامی بہترین طریقہ کار کو یقینی بنایا جائے تاکہ آٹزم سے متعلق تعلیم، علاج اور تحقیق کے شعبوں کو مؤثر بنایا جا سکے۔
مزید پڑھیں:نائب وزیراعظم اور وزیر خارجہ سینیٹر محمد اسحاق ڈار کی ہانگ کانگ کے چیف ایگزیکٹیو جان لی سے ملاقات
اجلاس میں معاون خصوصی برائے وزیراعظم طارق باجوا، سیکریٹری تعلیم، سیکریٹری صحت، اسپیشل سیکریٹری خزانہ، متعلقہ وزارتوں کے سینئر حکام اور شعبے کے ماہرین نے شرکت کی۔
