پی ایس ایل 11 کے کوالیفائر کے دوران نیشنل اسٹیڈیم کراچی میں سیکیورٹی کی صورتحال اس وقت غیر معمولی ہوگئی جب پشاور زلمی کے کپتان بابر اعظم کے مداح مختلف مواقع پر گراؤنڈ میں داخل ہو گئے۔
میچ کے دوران فیلڈنگ کے وقت 2 بار تماشائی بابر اعظم سے ملنے کی کوشش میں میدان میں گھس آئے، تاہم سیکیورٹی اہلکاروں نے فوری کارروائی کرتے ہوئے انہیں پکڑ کر باہر منتقل کردیا۔
اس سے قبل بھی ایک مداح بابر اعظم کی سینچری پر انہیں مبارکباد دینے کے لیے وکٹ تک پہنچ گیا تھا، جسے بھی موقع پر موجود عملے نے قابو کر لیا۔
واضح رہے کہ اسلام آباد یونائیٹڈ کے خلاف میچ میں پشاور زلمی کے بلے باز بابر اعظم نے سینچری اسکور کی، جس کی بدولت پشاور نے اسلام آباد کو جیت کے لیے 222 رنز کا ہدف دیا۔
