معروف ریئلٹی ٹی وی اسٹار نکول پولیزی نے انکشاف کیا ہے کہ سروائیکل کینسر کی تشخیص کے بعد سوشل میڈیا ان کے لیے حوصلہ اور امید کا اہم ذریعہ ثابت ہوا۔
غیر ملکی میڈیا کو دیے گئے ایک انٹرویو میں انہوں نے بتایا کہ اسٹیج ون کینسر کی تشخیص کے بعد وہ شدید خوف اور اضطراب کا شکار ہو گئی تھیں۔ ان کے بقول ’جب مجھے بیماری کے بارے میں معلوم ہوا تو مجھے لگا کہ شاید میں زندہ نہیں رہوں گی، اور میں بری طرح گھبرا گئی تھی‘۔
یہ بھی پڑھیں: شرمندگی جان لیوا ثابت ہوسکتی ہے، بڑی آنت کے کینسر کی وہ نشانیاں جو آپ کو معلوم ہونی چاہیں
انہوں نے مزید بتایا کہ ذہنی دباؤ سے نکلنے کے لیے انہوں نے سوشل میڈیا پلیٹ فارم ٹک ٹاک کا رخ کیا جہاں انہیں ایسی خواتین کی ویڈیوز دیکھنے کو ملیں جو اسی بیماری سے لڑ کر صحت یاب ہو چکی تھیں۔
نکول پولیزی کے مطابق ان ویڈیوز نے ان کے خوف کو کم کرنے اور امید بحال کرنے میں اہم کردار ادا کیا۔ ان کا کہنا تھا کہ ’میں نے متعدد ویڈیوز دیکھیں جن میں خواتین کہہ رہی تھیں کہ وہ اب ٹھیک ہیں اور صحت مند زندگی گزار رہی ہیں جس سے مجھے بھی حوصلہ ملا کہ میں بھی اس مشکل وقت سے نکل سکتی ہوں‘۔
یہ بھی پڑھیں: کینسر کی مریضہ نے لاعلاج قرار دیے جانے کے 5 دن بعد شادی کر لی
ریئلٹی اسٹار نے بتایا کہ اسی حوصلہ افزائی کے بعد انہوں نے اپنے کینسر کے سفر کو خود بھی سوشل میڈیا پر شیئر کرنے کا فیصلہ کیا تاکہ دیگر متاثرہ افراد کو ہمت مل سکے۔
انہوں نے کہا کہ اس عمل کے دوران انہیں دنیا بھر سے خواتین کی جانب سے بھرپور حمایت ملی جنہوں نے اپنے تجربات شیئر کیے اور یکجہتی کا اظہار کیا۔
یہ بھی پڑھیں: قدیم ترین دوا ’اسپرین‘ کینسر کا خطرہ کم کرتی ہے، نئی تحقیق
نکول پولیزی کا کہنا تھا کہ سوشل میڈیا نہ صرف معلومات کا ذریعہ بنا بلکہ اس نے انہیں ایک مضبوط کمیونٹی سے بھی جوڑ دیا جس نے ان کے علاج کے سفر کو نسبتاً آسان بنا دیا۔
