بنگلہ دیش کے دارالحکومت ڈھاکا کے نیو مارکیٹ علاقے میں فائرنگ کے واقعے میں ایک مبینہ خطرناک جرائم پیشہ شخص ہلاک ہو گیا۔ پولیس نے مقتول کی شناخت نعیم احمد ٹٹن کے نام سے کی ہے، جسے 1980 کی دہائی کا بدنام مجرم قرار دیا جاتا تھا۔
پولیس کے مطابق ٹٹن سنہ 2001 میں حکومت کی جانب سے جاری کیے گئے 23 انتہائی مطلوب مجرموں کی فہرست میں دوسرے نمبر پر شامل تھا۔ مقامی میڈیا رپورٹس میں بتایا گیا ہے کہ وہ حال ہی میں ضمانت پر رہا ہوا تھا۔
ابتدائی تحقیقات کے مطابق پولیس کو شبہ ہے کہ یہ قتل جرائم پیشہ گروہوں کے درمیان دشمنی کا نتیجہ ہو سکتا ہے۔
یہ بھی پڑھیے: ڈھاکا میں اسٹیل مل کے بوائلر میں دھماکا، 8 مزدور جھلس کر زخمی
رمنا ڈویژن کے ڈپٹی کمشنر مسعود عالم نے بتایا کہ مقتول کی شناخت کی تصدیق کر دی گئی ہے جبکہ حملہ آوروں کی تلاش جاری ہے۔
یہ واقعہ منگل کی شام تقریباً 7 بج کر 45 منٹ پر ڈھاکا یونیورسٹی سے متصل نیو مارکیٹ کے مغربی علاقے میں شاہنواز اسٹوڈنٹ ہاسٹل کے قریب پیش آیا۔ عینی شاہدین کے مطابق کئی حملہ آور موٹر سائیکلوں پر آئے اور اندھا دھند فائرنگ شروع کر دی۔
یہ بھی پڑھیے: امریکا کا ڈھاکا میں مغلیہ دور کی تاریخی مسجد کی بحالی کے لیے 2 لاکھ 35 ہزار ڈالر گرانٹ کا اعلان
فائرنگ کے نتیجے میں نعیم احمد ٹٹن کے سر اور جسم کے دیگر حصوں پر پانچ سے چھ گولیاں لگیں۔ راہگیروں نے انہیں فوری طور پر ڈھاکا میڈیکل کالج اسپتال منتقل کیا جہاں ڈاکٹروں نے رات 8 بج کر 27 منٹ پر ان کی موت کی تصدیق کر دی۔
پولیس نے واقعے کا مقدمہ درج کر کے تحقیقات شروع کر دی ہیں جبکہ شہر میں سیکیورٹی مزید سخت کر دی گئی ہے۔
