آزاد جموں و کشمیر الیکشن کمیشن نے ابتدائی انتخابی فہرستیں شائع کر دی ہیں اور عوام سے اپیل کی ہے کہ وہ اپنے ووٹ کے اندراج اور کوائف کی درستگی کے لیے مقررہ مدت میں جانچ پڑتال یقینی بنائیں۔
ترجمان الیکشن کمیشن راجہ شکیل خان کے مطابق اگر کسی اہل ووٹر کا نام انتخابی فہرست میں شامل نہ ہو یا درج معلومات میں کوئی غلطی موجود ہو تو فوری طور پر اصلاح کے لیے درخواست دی جا سکتی ہے۔
یہ بھی پڑھیے: الیکشن کمیشن نے مراد سعید کی نشست پر ضمنی انتخاب مؤخر کر دیا
الیکشن کمیشن کے مطابق دعوے، اعتراضات اور درستگی سے متعلق درخواستیں متعلقہ رجسٹریشن افسران کے پاس جمع کروائی جائیں گی تاکہ بروقت کارروائی ممکن بنائی جا سکے۔
ترجمان نے بتایا کہ انتخابی فہرستوں پر دعوے اور اعتراضات جمع کروانے کی آخری تاریخ 28 اپریل 2026 مقرر کی گئی ہے، لہٰذا شہری مقررہ وقت کے اندر اپنے ووٹ کی تصدیق اور ضروری درستگی مکمل کریں۔
یہ بھی پڑھیے: الیکشن کمیشن آف پاکستان نے آج مقدمات کی سماعتیں منسوخ کر دیں
الیکشن کمیشن نے زور دیا ہے کہ شفاف اور درست انتخابی عمل کے لیے عوامی تعاون ناگزیر ہے، جبکہ درست انتخابی فہرستوں کی تیاری سے جمہوری نظام مزید مضبوط ہوگا۔
ترجمان کے مطابق شہری اپنے ووٹ کی تفصیلات چیک کر کے انتخابی عمل میں بھرپور حصہ لینے کو یقینی بنائیں۔
