معروف اداکار اور فیشن ڈیزائنر دیپک پروانی نے انکشاف کیا ہے کہ وہ گزشتہ تین ماہ کے دوران شہر میں تین مرتبہ ڈکیتی کا نشانہ بن چکے ہیں جس سے کراچی میں بڑھتے ہوئے جرائم پر تشویش میں اضافہ ہو گیا ہے۔
سماجی رابطے کے پلیٹ فارم ایکس (سابقہ ٹوئٹر) پر جاری اپنے بیان میں دیپک پروانی نے بتایا کہ ان سے اسلحے کے زور پر گاڑی، موٹر سائیکل اور نقدی چھین لی گئی۔ انہوں نے کہا کہ یہ صورتحال صرف ان تک محدود نہیں بلکہ ان کے عملے کے افراد بھی جرائم کی لپیٹ میں آ رہے ہیں۔
In three months I’ve had a car stolen a motorcycle and cash on gun point . Crime is on the rise in karachi people are dying inflation is through the roof . A workers house has been robbed twice this month . Ones son has been beaten for extortion.#pakistan
— Deepak perwani (@DPerwani) April 27, 2026
انہوں نے مزید انکشاف کیا کہ ان کے ایک ملازم کے گھر میں رواں ماہ دو مرتبہ چوری کی واردات پیش آئی جبکہ ایک اور ملازم کے بیٹے کو مبینہ طور پر بھتہ نہ دینے پر تشدد کا نشانہ بنایا گیا۔ ان کے مطابق کراچی میں جرائم کی شرح خطرناک حد تک بڑھ چکی ہے جہاں ایک جانب شہری عدم تحفظ کا شکار ہیں تو دوسری جانب مہنگائی بھی عروج پر ہے۔
دیپک پروانی کے بیان پر سوشل میڈیا صارفین نے گہری تشویش کا اظہار کیا ہے۔ متعدد صارفین نے صوبائی حکومت، خصوصاً پاکستان پیپلز پارٹی کو تنقید کا نشانہ بناتے ہوئے امن و امان کی صورتحال بہتر بنانے کے لیے فوری اور مؤثر اقدامات کا مطالبہ کیا ہے۔
