شہر میں معیاری اور جدید طبی سہولیات کی فراہمی کی جانب اہم پیشرفت سامنے آئی ہے، جہاں الخدمت ڈائیگناسٹک کرچی نے جدید سالماتی تشخیصی سروسز شروع کرنے کا اعلان کر دیا ہے، جس سے مریضوں کو جدید اور کم لاگت تشخیصی سہولیات میسر آئیں گی۔
یہ بھی پڑھیں:الخدمت فاؤنڈیشن نے اب تک 10 ارب روپے کی امداد غزہ پہنچا دی گئی، ایئر مارشل (ر) ارشد ملک
ادارے کی جانب سے جدید ترین سیک اسٹوڈیو جینیٹک اینالائزر (جینیاتی تجزیہ کار) کی تنصیب مکمل کر لی گئی ہے، جو ڈی این اے کے اجزا کے تجزیے اور روایتی جینیاتی ترتیب بندی کے ذریعے جینیاتی تبدیلیوں کی انتہائی درست تشخیص ممکن بنائے گا۔
الخدمت انتطامیہ کے مطابق یہ جدید نظام موروثی بیماریوں جیسے سسٹک فائبر وسس اور بیٹا تھیلیسیمیا کی تشخیص میں مددگار ثابت ہوگا، جبکہ کینسر کے شعبے میں بھی اہم کردار ادا کرے گا، جہاں مخصوص جینیاتی تبدیلیوں کی نشاندہی کے ذریعے ہدفی علاج کو مؤثر بنایا جا سکے گا۔
اس کے علاوہ اس سہولت کے تحت خون کے کینسر کی نوعیت کی جانچ، اعضا کی پیوند کاری کے لیے جینیاتی مطابقت کی جانچ، اور بیکٹیریا و فنگس سمیت مختلف جراثیمی انفیکشنز کی شناخت بھی ممکن ہوگی۔ یہ پلیٹ فارم جدید جینیاتی ترتیب بندی کے نتائج کی تصدیق کے لیے بھی استعمال کیا جائے گا۔
یہ بھی پڑھیں:الخدمت ڈائگنوسٹک کا تاریخی سنگ میل: ایف سی پی ایس پوسٹ گریجویٹ ٹریننگ کے لیے تسلیم شدہ قرار
الخدمت کے ترجمان کے مطابق یہ پیش رفت جدید طبی ٹیکنالوجی کے فروغ اور مریضوں کو بہتر سہولیات فراہم کرنے کے عزم کی عکاسی کرتی ہے۔ جدید خودکار نظام اور کمپیکٹ ڈیزائن کے باعث نتائج جلد اور زیادہ درستگی کے ساتھ حاصل کیے جا سکیں گے، جس سے بیرونی لیبارٹریز پر انحصار بھی کم ہوگا۔
یہ سروسز جلد شروع کیے جانے کا امکان ہے، جس سے کراچی میں سستی اور معیاری سالماتی تشخیصی سہولیات تک رسائی میں نمایاں بہتری آئے گی۔
