پاکستان اور سنگاپور کے درمیان سفارتی تعلقات کے 60 سال مکمل ہونے پر سنگاپور میں ایک روح پرور قوالی کی محفل کا انعقاد کیا گیا، جس میں مختلف شعبہ ہائے زندگی سے تعلق رکھنے والی بڑی تعداد نے شرکت کی۔
سنگاپور میں پاکستان ہائی کمیشن نے ’ایسپلینیڈ تھیٹرز آن دی بے‘ کے اشتراک سے ’محبوب کے قدموں میں‘ کے عنوان سے قوالی پروگرام منعقد کیا۔ اس تقریب میں سفارتی حلقوں، کاروباری شخصیات، فنونِ لطیفہ سے وابستہ افراد، پاکستانی کمیونٹی اور عام شہریوں نے بھرپور شرکت کی، جو دونوں ممالک کے درمیان مضبوط تعلقات اور عوامی روابط کی عکاسی ہے۔
Pakistan High Commission in Singapore organized a Qawwali performance titled “At the Feet of the Beloved” to commemorate the 60th anniversary of diplomatic relations between Pakistan and Singapore. pic.twitter.com/6UfURfqqaP
— Pakistan TV Digital (@PakistanTVcom) May 1, 2026
محفل میں معروف قوال جوڑی رضوان اور معظم نے اپنے فن کا مظاہرہ کیا۔ یہ دونوں لیجنڈری قوال نصرت فتح علی خان کے بھتیجے ہیں اور صوفیانہ موسیقی کی صدیوں پرانی روایت کو آگے بڑھا رہے ہیں۔ ان کی روحانی اور دلنشین پرفارمنس نے حاضرین کو مسحور کر دیا اور پاکستان کے ثقافتی ورثے کی خوبصورتی کو اجاگر کیا۔
تقریب سے خطاب کرتے ہوئے سنگاپور میں پاکستان کی ہائی کمشنر رابعہ شفیق نے کہا کہ قوالی صوفیا کی تعلیمات سے جڑی ہوئی ایک طاقتور روحانی روایت ہے، جو محبت، ہم آہنگی اور عقیدت کا پیغام دیتی ہے اور مختلف ثقافتوں اور قوموں کو جوڑنے کا ذریعہ بنتی ہے۔
اس موقع پر ہائی کمشنر کی جانب سے سفارتکاروں اور معزز مہمانوں کے اعزاز میں استقبالیہ بھی دیا گیا، جس سے باہمی روابط کو مزید فروغ ملا۔ تقریب نے پاکستان کے بھرپور ثقافتی ورثے کو اجاگر کرنے کے ساتھ ساتھ سنگاپور کے ساتھ تعلقات کو مزید مضبوط بنانے کے عزم کی بھی عکاسی کی۔
