پاکستان سپر لیگ 11 کے فائنل کے موقع پر لاہور میں ٹریفک پولیس نے خصوصی انتظامات مکمل کر لیے ہیں تاکہ شہریوں اور شائقینِ کرکٹ کو کسی قسم کی پریشانی کا سامنا نہ ہو۔
سی ٹی او لاہور کے مطابق فائنل میچ کے دوران ٹریفک کی روانی برقرار رکھنے کے لیے 8 ڈی ایس پیز، 90 ٹریفک انسپکٹرز اور 500 سے زائد وارڈنز ڈیوٹی انجام دیں گے۔ اس کے ساتھ ساتھ غلط پارکنگ کی روک تھام کے لیے 11 لفٹرز بھی تعینات کیے گئے ہیں۔
یہ بھی پڑھیے: پی ایس ایل 11 کا فائنل آج، پشاور زلمی اور حیدرآباد کنگز میں ٹائٹل کی جنگ
شائقین کے لیے پانچ خصوصی پارکنگ اسٹینڈز قائم کیے گئے ہیں جن میں گورنمنٹ کالج فار بوائز اور سی بی ڈی پارکنگ شامل ہیں۔ مغل پورہ اور گڑھی شاہو سے آنے والے شہری اپنی گاڑیاں مین بلیوارڈ گلبرگ اور لبرٹی کے اطراف میں پارک کر سکیں گے۔
ٹریفک پولیس کے مطابق مال روڈ، جیل روڈ اور کینال روڈ سمیت اہم شاہراہیں ٹریفک کے لیے کھلی رہیں گی تاکہ شہریوں کی آمد و رفت متاثر نہ ہو۔
دوسری جانب سیکیورٹی کے سخت انتظامات بھی کیے گئے ہیں۔ آئی جی پنجاب کے مطابق فائنل میچ کے دوران 7 ہزار سے زائد پولیس اہلکار سیکیورٹی ڈیوٹی پر تعینات ہوں گے تاکہ غیر ملکی اور ملکی کھلاڑیوں، آفیشلز اور شائقین کو مکمل تحفظ فراہم کیا جا سکے۔
یہ بھی پڑھیے: پی ایس ایل 11: فاتح اور رنر اپ ٹیم کو کتنی انعام رقم ملے گی؟ تفصیلات سامنے آگئیں
انہوں نے بتایا کہ اسٹیڈیم، کھلاڑیوں کی رہائش گاہوں اور روٹس کے اطراف سرچ آپریشنز اور انٹیلی جنس بنیادوں پر کارروائیاں جاری ہیں۔ حساس مقامات اور بلند عمارتوں پر اسنائپرز بھی تعینات کیے گئے ہیں۔
آئی جی پنجاب نے مزید کہا کہ تمام ادارے باہمی رابطے میں ہیں تاکہ پی ایس ایل 11 کے فائنل کا انعقاد پُرامن اور محفوظ ماحول میں یقینی بنایا جا سکے۔
