دنیا کی مقبول ترین میسنجر ایپ واٹس ایپ نے اپنے انٹرفیس کو مکمل طور پر جدید بنانے کے لیے ‘لیکوئیڈ گلاس’ ڈیزائن لینگویج پر کام تیز کردیا ہے، جس کے تحت اب میسج ری ایکشن ٹرے اور کانٹیکسٹ مینو کو بھی نیا روپ دیا جارہا ہے۔
واٹس ایپ کی اپڈیٹس پر نظر رکھنے والے ادارے ‘ویب بیٹا انفو’ کے مطابق اس نئی تبدیلی کا مقصد ایپ کے تمام بصری عناصر میں یکسانیت لانا ہے، کیونکہ اس وقت ری ایکشن ٹرے اور میسج مینو ٹھوس اور گہرے رنگوں پر مبنی ہیں جو نئے ڈیزائن کے ساتھ میل نہیں کھاتے۔
یہ بھی پڑھیں: واٹس ایپ کا اپنا کلاؤڈ اسٹوریج: گوگل ڈرائیو اور آئی کلاؤڈ کی ضرورت نہیں رہے گی
نئی اپڈیٹ کے بعد جب صارف کسی میسج پر ری ایکٹ کرنے کے لیے اسے ٹیپ کرے گا، تو سامنے آنے والی ایموجی ٹرے شیشے کی طرح شفاف ہوگی، جو پس منظر کے رنگوں اور پیغامات کو منعکس کرنے کی صلاحیت رکھے گی۔
رپورٹ میں بتایا گیا ہے کہ یہ تبدیلی صرف ری ایکشن ٹرے تک محدود نہیں ہوگی بلکہ پیغامات کے ‘کانٹیکسٹ مینو’ کو بھی اسی طرز پر ڈھالا جارہا ہے۔
اس وقت واٹس ایپ کی چیٹ لسٹ میں تو مینو کو اپڈیٹ کر دیا گیا ہے، لیکن چیٹ کے اندر میسج سلیکٹ کرنے پر آنے والا مینو اب بھی پرانے اسٹائل کا ہے، جسے اب لیکوئیڈ گلاس میٹریل سے بدلا جائے گا تاکہ یہ پس منظر کے ساتھ بہتر طور پر گھل مل جائے۔
یہ بھی پڑھیں: پرانے اینڈرائیڈ پر واٹس ایپ جلد بند ہوجائے گا، کہیں آپ کا فون بھی تو نشانے پر نہیں؟
دلچسپ بات یہ ہے کہ واٹس ایپ چیٹ انٹرفیس کے دیگر حصوں، جیسے نیویگیشن بار اور چیٹ بار کو بھی شفاف بنانے پر کام کر رہا ہے، تاہم فی الوقت کانٹیکسٹ مینو کھلنے پر پوری اسکرین کو دھندلا کرنے کا فیچر شامل نہیں کیا گیا، جس پر مستقبل میں کام متوقع ہے۔
واٹس ایپ کی کوشش ہے کہ وائس نوٹ پلیئر اور پوری گفتگو کے انٹرفیس کو ایک ساتھ اس نئے ڈیزائن کے مطابق لانچ کیا جائے تاکہ صارفین کو ایک مربوط اور ہموار تجربہ مل سکے۔
یہ فیچر فی الحال آئی او ایس کے بیٹا ورژن پر تیاری کے مراحل میں ہے اور آزمائش مکمل ہونے کے بعد اسے عام صارفین کے لیے جاری کیا جائے گا۔
