امریکی صدر ڈونلڈ ٹرمپ نے کہا ہے کہ انہیں توقع ہے ایران کی جانب سے جنگ بندی سے متعلق امریکی تجاویز کا جواب جلد موصول ہو جائے گا۔
صحافیوں سے گفتگو کرتے ہوئے صدر ٹرمپ نے بتایا کہ اس حوالے سے پیش کی گئی تجاویز پر ایران سے ردعمل جلد آنے کا امکان ہے۔
انہوں نے خبردار کرتے ہوئے کہا کہ اگر معاملات آگے نہ بڑھے تو امریکا دوبارہ پروجیکٹ فریڈم کی طرف جا سکتا ہے اور اس آپریشن کو دوبارہ شروع کیا جا سکتا ہے۔
ان کے مطابق پروجیکٹ فریڈم ایک اچھا اقدام ہے، تاہم اسے مختلف طریقوں سے بھی انجام دیا جا سکتا ہے۔
ٹرمپ نے مزید کہا کہ اس صورت میں یہ اقدام پروجیکٹ فریڈم پلس کی شکل اختیار کر سکتا ہے جس میں مزید عناصر بھی شامل ہوں گے۔
اس سے قبل امریکی وزیر خارجہ مارکو روبیو نے کہا تھا کہ ایران کی جانب سے امریکی تجاویز پر تاحال کوئی جواب موصول نہیں ہوا، تاہم امید ہے کہ آج ایران اپنا ردعمل دے گا اور سنجیدہ مذاکرات کی طرف پیش رفت ہوگی۔
واضح رہے کہ امریکی صدر ڈونلڈ ٹرمپ نے پاکستان کی درخواست پر آبنائے ہرمز میں آپریشن پروجیکٹ فریڈم روک دیا تھا۔
