وفاقی وزیر اطلاعات و نشریات عطا اللہ تارڑ نے کہا ہے کہ میڈیا ورکرز کا تحفظ حکومت کی اولین ترجیح ہے اور وفاقی و صوبائی حکومتیں میڈیا چینلز کے لیے آسانیاں پیدا کرنے کے لیے دن رات کوشاں ہیں۔
یہ بھی پڑھیں: حکومت پنجاب کا صحافیوں اور میڈیا ورکرز کو مفت پلاٹ دینے کا اعلان
پیر کے روز قومی اسمبلی میں اظہار خیال کرتے ہوئے عطاتارڑ نے واضح کیا کہ میڈیا ورکرز کے حقوق کا تحفظ ہر صورت یقینی بنایا جائے گا اور اس سلسلے میں پاکستان براڈ کاسٹنگ ایسوسی ایشن کے ساتھ صحافیوں کے روزگار کے تحفظ کا معاملہ اٹھایا جائے گا تاکہ جاب سیکیورٹی اور مراعات کے حوالے سے درپیش معاملات کو مستقل بنیادوں پر طے کیا جا سکے۔
وفاقی وزیر کا مزید کہنا تھا کہ میڈیا ورکرز کے دیرینہ مسائل کے حل کے لیے ٹھوس اقدامات کیے جائیں گے اور اس مقصد کے لیے اتحادیوں کے ساتھ ساتھ اپوزیشن کو بھی ساتھ لے کر چلیں گے تاکہ مل کر صحافیوں کے مسائل حل کیے جاسکیں۔
یہ بھی پڑھیں: میڈیا اداروں کو ادائیگی اپنے ملازمین کو بروقت تنخواہیں دینے سے مشروط ہوگی، پنجاب حکومت کا فیصلہ
انہوں نے اس عزم کا اعادہ کیا کہ صحافتی برادری کو درپیش مشکلات کا خاتمہ اور ان کے معاشی و سماجی حقوق کی فراہمی حکومت کے ایجنڈے میں سرِفہرست ہے۔
