پاکستان تحریک انصاف (پی ٹی آئی) کے سینیئر رہنما سینیٹر علی ظفر نے کہا ہے کہ تحریک انصاف سمیت اپوزیشن جماعتیں باہمی مشاورت کے بعد اپنی حکمتِ عملی طے کرتی ہیں۔ حکومت کے ساتھ مذاکرات میں ابھی تک کوئی بڑی پیشرفت نہیں ہوئی۔
وی نیوز سے گفتگو کرتے ہوئے انہوں نے کہاکہ اپوزیشن کے اندر کسی بڑے اختلاف کی صورتحال موجود نہیں، البتہ بعض اوقات فاصلہ یا مختلف اندازِ عمل کا تاثر ضرور پیدا ہو جاتا ہے۔
حکومت سے مذاکرات پر ابھی کوئی بڑی پیش رفت نہیں ہوئی ،سینیٹر علی ظفر pic.twitter.com/YVumszT4MU
— WE News (@WENewsPk) May 12, 2026
انہوں نے کہاکہ حکومت اور اپوزیشن کے درمیان جاری مذاکراتی عمل میں اب تک کوئی بڑی پیش رفت سامنے نہیں آئی، اور انہیں دستیاب معلومات کے مطابق یہ عمل ابھی ابتدائی مرحلے میں ہے۔
ان کے مطابق ان کی اپنی رائے میں ان مذاکرات کو مزید تیز کرنے کی ضرورت ہے۔
سینیٹر علی ظفر نے مزید کہاکہ عمران خان کی جانب سے اپوزیشن رہنماؤں کو جو ذمہ داری دی گئی تھی، وہ تاحال مکمل طور پر پوری ہوتی نظر نہیں آ رہی، تاہم کوششیں جاری ہیں۔
انہوں نے بتایا کہ وہ جلد محمود اچکزئی سمیت دیگر رہنماؤں سے ملاقات کریں گے جس میں مذاکراتی عمل اور موجودہ سیاسی صورتحال پر تفصیلی گفتگو کی جائے گی۔
