امریکی صدر ڈونلڈ ٹرمپ نے کہا ہے کہ ایران کے ساتھ مذاکرات کے عمل میں پاکستان کا کردار شاندار رہا، وزیراعظم شہباز شریف اور فیلڈ مارشل عاصم منیر بہترین شصیت ہیں۔
میڈیا سے گفتگو کرتے ہوئے انہوں نے کہاکہ چینی صدر کے ساتھ ملاقات میں ایران جنگ کے حوالے سے تفصیلی بات چیت ہوگی، چاہتے ہیں، لیکن میں نہیں سمجھتا کہ اس معاملے پر ہمیں ان کی مدد کی ضرورت ہوگی۔
مزید پڑھیں: امریکا ایران مذاکرات میں پاکستان نے تعمیری کردار ادا کیا، چین کی جانب سے حمایت کا اعادہ
انہوں نے کہاکہ ہم چاہتے ہیں ایران کے ساتھ ایک اچھی ڈیل ہو جائے، یقین ہے کہ ممکنہ معاہدہ امریکی عوام کے لیے بہت اچھا ہوگا۔
قبل ازیں ایک بیان میں ڈونلڈ ٹرمپ نے کہاکہ انہیں مکمل یقین ہے کہ ایران یورینیم کی افزودگی کا عمل مکمل طور پر بند کر دے گا، تاہم معاہدے میں جلد بازی نہیں کی جائےگی۔ ایران مستقبل میں جوہری ہتھیاروں کے حصول کی کوششیں بھی ترک کر دے گا۔
صدر ٹرمپ کے مطابق امریکا ایران کے ایٹمی فضلے تک رسائی حاصل کرے گا جبکہ دونوں ممالک کے درمیان ممکنہ معاہدے پر تیزی سے پیش رفت کی ضرورت ہے، تاہم اس معاملے میں جلد بازی سے گریز کیا جائے گا۔
انہوں نے مزید کہاکہ موجودہ ناکہ بندی کے ماحول میں ایران سے متعلق کسی بھی فیصلے میں احتیاط برتی جائے گی۔
ان کے بقول مذاکرات کے دوران ایرانی حکام کے ساتھ براہِ راست رابطے بھی کیے گئے۔
واضح رہے کہ ایک روز قبل بھی صدر ٹرمپ نے دعویٰ کیا تھا کہ امریکا نے بڑی عسکری کامیابی حاصل کی ہے اور ایران کے معاملے پر وہ کسی دباؤ کا شکار نہیں۔
انہوں نے یہ بھی کہا تھا کہ ایران کے خلاف مکمل کامیابی حاصل کی جائے گی، جبکہ ایران کا تنازع ختم ہونے کی صورت میں تیل کی قیمتوں میں کمی کا امکان بھی ظاہر کیا تھا۔
مزید پڑھیں: کیا امریکا ایران مذاکرات کے دوسرے دور کا آغاز ہونے جا رہا ہے؟
قبل ازیں صدر ڈونلڈ ٹرمپ نے امریکی تجاویز پر ایران کی جانب سے دیا گیا جواب مسترد کردیا تھا، اور دھمکی دی تھی کہ وہ آپریشن ’فریڈم پروجیکٹ‘ دوبارہ شروع کر سکتے ہیں۔
