وفاقی وزیر برائے بحری امور جنید انور چوہدری نے کہا ہے کہ ملک میں بحری تعلیم کے فروغ اور ادارہ جاتی بہتری کے لیے اہم اصلاحات جاری ہیں، جن کے تحت پاکستان میری ٹائم اکیڈمی کو ڈگری ایوارڈنگ درجہ دینے کا بل جلد ہی قومی اسمبلی میں پیش کردیا جائے گا۔
پاکستان میرین اکیڈمی کے دورے کے موقع پر انہوں نے بتایا کہ اکیڈمی کو ڈگری ایوارڈنگ انسٹیٹیوٹ کا درجہ دینے کے حوالے سے تمام متعلقہ اسٹیک ہولڈرز سے مشاورت مکمل کر لی گئی ہے، جبکہ بل کو مناسب وقت پر قومی اسمبلی میں پیش کیا جائے گا۔
یہ بھی پڑھیں: میری ٹائم سیکیورٹی مشق سی گارڈ-26 کراچی میں کامیابی سے اختتام پذیر
دورے کے دوران اکیڈمی کے قائم مقام کمانڈنٹ محمد آصف فاروق نے وفاقی وزیر کو ادارے کی مجموعی کارکردگی، جاری ترقیاتی منصوبوں اور تربیتی پروگراموں پر تفصیلی بریفنگ دی۔
بریفنگ میں بتایا گیا کہ وزیر اعظم کے میری ٹائم اصلاحاتی ایجنڈے کے تحت کراچی پورٹ ٹرسٹ، پورٹ قاسم اتھارٹی اور پاکستان نیشنل شپنگ کارپوریشن کے اہلکاروں کو خصوصی تربیت فراہم کی گئی ہے، جس میں بنیادی فائر فائٹنگ اور نومبر 2025 میں ہونے والے نیوی ٹرینر پروفیشنل کورسز شامل ہیں۔
مزید بتایا گیا کہ اکیڈمی کے 14 انسٹرکٹرز کو کوالیفائیڈ ٹرینرز کا درجہ دیا جا چکا ہے، جس سے ادارے کی تربیتی صلاحیت میں نمایاں بہتری آئی ہے۔
ترقیاتی منصوبوں کے لیے 42 کروڑ 10 لاکھ روپے کی مالی معاونت کارپوریٹ سوشل ریسپانسبلٹی فنڈنگ کے ذریعے فراہم کی جائے گی، جو متعلقہ اداروں کے اشتراک سے حاصل ہوگی۔
وفاقی وزیر نے ہدایت کی کہ اکیڈمی کے تربیتی پروگرامز کو بلوچستان کے طلبہ تک بھی وسیع کیا جائے تاکہ بحری شعبے میں شمولیتی مواقع بڑھ سکیں۔
مزید پڑھیں: میری ٹائم شعبے میں ترقی کا سب سے پہلے فائدہ ساحلی آبادیوں کو پہنچنا چاہیے، وفاقی وزیر احسن اقبال
اس مقصد کے لیے نیشنل ووکیشنل اینڈ ٹیکنیکل ٹریننگ کمیشن اور بینظیر انکم سپورٹ پروگرام سے تعاون حاصل کیا جائے گا۔
انہوں نے کہا کہ پاکستان میرین اکیڈمی کو جدید خطوط پر استوار کرنا حکومت کی وسیع تر بحری حکمت عملی کا حصہ ہے، جس کا مقصد ملکی اور بین الاقوامی سطح پر ہنر مند افرادی قوت تیار کرنا ہے۔
