’ایسی قربانیوں کی مثال دنیا کی تاریخ میں نہیں ملتی‘، وزیراعظم شہباز شریف کا شہدا کو خراجِ عقیدت

وزیراعظم شہباز شریف نے وفاقی کابینہ کے اجلاس میں شہدا کی قربانیوں کو خراجِ عقیدت پیش کرتے ہوئے کہا ہے کہ وطن کے لیے جانیں قربان کرنے والوں جیسی مثال دنیا کی تاریخ میں کم ہی ملتی ہے۔ انہوں نے کہا کہ قوم کے یہ بہادر سپوت اپنی جانوں کا نذرانہ دے کر دھرتی کی آبیاری کر رہے ہیں۔

یہ بھی پڑھیں:دہشتگردوں کو ایسی عبرتناک شکست دیں گے کہ وہ پاکستان کی طرف میلی آنکھ سے دیکھنے کی جرأت نہیں کریں گے، وزیراعظم شہباز شریف

وفاقی کابینہ کے اجلاس میں گفتگو کرتے ہوئے وزیراعظم شہباز شریف نے ایک شہید لیاقت کا ذکر کرتے ہوئے کہا کہ وہ ایک نہایت دلیر شہری تھا، جس نے خطرہ محسوس کرتے ہی فوری طور پر اپنی جان قربان کر دی۔ وزیراعظم نے کہا کہ ایسی قربانیاں صرف اپنے خاندان ہی نہیں بلکہ پوری قوم کے لیے دی جا رہی ہیں۔

انہوں نے کہا کہ میں سمجھتا ہوں کہ قوم کے حوالے سے دی جانے والی ایسی قربانیوں کی دنیا کی تاریخ میں دوسری مثال نہیں ملتی۔

وزیراعظم نے بتایا کہ چند روز قبل راولپنڈی میں بھی ایک اور شہید کی قربانی کا واقعہ سامنے آیا، جو اس بات کا ثبوت ہے کہ وطن کے محافظ اور شہری ملک کی سلامتی کے لیے مسلسل اپنی جانوں کا نذرانہ پیش کر رہے ہیں۔

یہ بھی پڑھیں:کوہاٹ کے بہادر شہری لیاقت شہید کے لیے ستارۂ شجاعت کی منظوری

اجلاس کے دوران وزیراعظم نے شرکاء سے تمام شہداء کے لیے دعا کی اپیل کرتے ہوئے کہا کہ “سردار صاحب! آپ سے درخواست ہے کہ سب شہداء کے لیے ہاتھ اٹھائیں اور ان کے لیے دعا کریں۔”