اداکارہ حنا الطاف نے کام کی جگہ پر ہراسانی کے ایک ناخوشگوار واقعے سے بچنے کے بعد خواتین سے اجتماعی طور پر متحد ہو کر ایسے مسائل کے خلاف آواز اٹھانے کی اپیل کی ہے۔
انہوں نے بتایا کہ وہ شوٹنگ کے دوران ایک ایسے فرد سے ملیں جن کے بارے میں انہیں خطرے کا احساس ہوا تاہم اپنی حاضر دماغی کے باعث وہ بہانہ بنا کر وہاں سے نکلنے میں کامیاب رہیں۔
یہ بھی پڑھیں: حنا الطاف سے شادی اور پھر طلاق کا فیصلہ کیوں کیا؟ آغاعلی نے خاموشی توڑ دی
حنا الطاف کے مطابق انہوں نے اس واقعے سے متعلق پروڈکشن ٹیم کو آگاہ کر دیا ہے تاہم ان کے لیے یہ امر انتہائی افسوسناک ہے کہ پاکستان میں ایک کام کرنے والی یا عام عورت کو اپنی حفاظت کے لیے مسلسل چوکنا رہنا پڑتا ہے۔
اداکارہ نے کہا کہ ہر وقت محتاط رہنا ذہنی طور پر تھکا دینے والا عمل ہے، اور یہ کہ ’سمارٹ ہونا‘ بہت سی خواتین کے لیے ایک لازمی بقا کا ذریعہ بن چکا ہے کیونکہ انہیں محفوظ ماحول میسر نہیں۔
یہ بھی پڑھیں: ’صحیح شخص زندگی میں آئے تو شادی کریں‘ اداکارہ حنا الطاف کا مشورہ
انہوں نے زور دیا کہ خواتین کو چاہیے کہ وہ اپنے تجربات پر خاموش نہ رہیں، ضرورت پڑنے پر فوری اقدام کریں اور ہر ناانصافی پر جوابدہی کا مطالبہ کریں۔
حنا الطاف نے کہا کہ جب تک حالات بہتر نہیں ہوتے خواتین کو ایک دوسرے کے ساتھ کھڑے ہو کر اجتماعی طور پر جدوجہد کرنا ہوگی تاکہ اس طرح کے واقعات کا خاتمہ ممکن بنایا جا سکے۔
