پاکستان کو عالمی سطح پر تنہا کرنے کی بھارتی کوششیں خود بھارت کے لیے تنہائی کا سبب بننے لگیں، را کے سابق سربراہ اے ایس دلت نے اس حقیقت کا اعتراف کرلیا۔
بھارتی خفیہ ایجنسی ’را‘ کے سابق سربراہ اے ایس دلت نے برطانوی نشریاتی ادارے کو دیے گئے انٹرویو میں کہا کہ پاکستان کو دنیا میں الگ تھلگ کرنے کا بیانیہ اب پرانا ہوچکا ہے۔
مزید پڑھیں: پسند کی شادی کا خوفناک انجام، جیکب آباد میں پورا گاؤں جلا دیا گیا
انہوں نے واضح کیا کہ پاکستان نہ کبھی ٹوٹے گا اور نہ ہی بکھرے گا۔ ان کے مطابق آج پاکستان ایران اور امریکا کے درمیان ثالثی کا کردار ادا کررہا ہے، جبکہ یہ کردار دراصل بھارت کو نبھانا چاہیے تھا۔
اے ایس دلت نے مسئلہ کشمیر کے حل کے لیے مذاکرات کو ناگزیر قرار دیتے ہوئے کہا کہ پاکستان اور بھارت کے درمیان بات چیت کا سلسلہ کبھی منقطع نہیں ہونا چاہیے۔
یاد رہے کہ 2 روز قبل آر ایس ایس کے سیکریٹری جنرل دتاتریہ ہوسابالے نے بھی کہا تھا کہ بھارت کو پاکستان کے ساتھ مذاکرات کے لیے ہمیشہ تیار رہنا چاہیے اور رابطے کے دروازے بند نہیں کرنے چاہییں۔
مزید پڑھیں: بھارت میں پاکستان کے ساتھ مذاکرات کی آوازیں: یہ تبدیلی کیوں اور کیسے آئی؟
اس سے قبل بھارتی فوج کے سابق سربراہ منوج نروانے کا کہنا تھا کہ دونوں ممالک کے عوام کے مسائل یکساں ہیں اور ان کا سیاست سے براہِ راست کوئی تعلق نہیں۔
