سائنسدانوں کی نئی تحقیق میں انکشاف ہوا ہے کہ وٹامن بی ٹو (رائبوفلیون) بعض حالات میں کینسر کے خلیات کو تباہ ہونے سے بچانے میں مدد دے سکتا ہے۔ ماہرین کے مطابق یہ دریافت مستقبل میں کینسر کے علاج سے متعلق نئی راہیں کھول سکتی ہے۔
یہ بھی پڑھیں:نوجوانوں میں 11 اقسام کے کینسر میں اضافہ، سائنسدانوں نے ممکنہ وجہ کا ابتدائی سراغ لگا لیا
وٹامن بی ٹو انسانی جسم کے لیے ایک اہم غذائی جزو ہے جو چکنائی اور پروٹین کو توانائی میں تبدیل کرنے، جلد، خون کے خلیات اور جسمانی جھلیوں کی صحت برقرار رکھنے میں اہم کردار ادا کرتا ہے۔ یہ وٹامن دودھ، انڈوں، گوشت اور سبز سبزیوں میں پایا جاتا ہے۔
تحقیق میں بتایا گیا کہ وٹامن بی ٹو کے میٹابولزم سے ایسے مالیکیولز بنتے ہیں جو خلیات کو آکسیڈیٹو نقصان سے بچاتے ہیں، تاہم یہی عمل کینسر کے خلیات کیلئے بھی حفاظتی ڈھال بن سکتا ہے۔
ماہرین کے مطابق یہ وٹامن ’فیروپٹوسس‘ نامی ایک خاص قسم کے پروگرامڈ سیل ڈیتھ کو روکنے میں کردار ادا کرتا ہے۔ فیروپٹوسس وہ قدرتی عمل ہے جس کے ذریعے جسم خراب یا خطرناک خلیات کو ختم کرتا ہے اور اسے کینسر کے خلاف اہم دفاعی نظام سمجھا جاتا ہے۔
یہ بھی پڑھیں:کینسر چوتھے مرحلے تک پہنچنے سے پہلے کیسے روکا جا سکتا ہے؟ سونالی باندرے نے بتادیا
تحقیق کے دوران سائنسدانوں نے ’روزوفلیون‘ نامی ایک مرکب استعمال کیا جو وٹامن بی ٹو جیسا ہے۔ اس مرکب کے ذریعے انہوں نے کینسر خلیات کی حفاظتی صلاحیت کو کم کیا، جس کے بعد وہ تباہ ہونے لگے۔
تحقیقی ٹیم کے سربراہ پروفیسر جوزے پیڈرو فرائیڈمین اینجیلی کے مطابق وٹامن بی ٹو کینسر خلیات کو مخصوص قسم کی موت سے بچانے میں اہم کردار ادا کرتا ہے، اسی لیے اس کے اثرات کو مزید سمجھنا ضروری ہے۔
یہ تحقیق جرنل ’نیچر سیل بائیولوجی‘ میں شائع ہوئی جبکہ اس منصوبے کو جرمن ریسرچ فاؤنڈیشن نے بھی سپورٹ کیا۔
