وفاقی وزیر مذہبی امورسردارمحمد یوسف 16 مئی 2026 کو حج انتظامات کا جائزہ لینے کے لیے سعودی عرب پہنچیں گے۔ سعودی عرب روانگی سے قبل انہوں نے عازمین حج کو ہر ممکن سہولیات کی فراہمی کے عزم کا اعادہ کیا۔
مزید پڑھیں:سعودی عرب: حج انتظامات کے لیے نیا ڈیجیٹل نظام ’نسک مسار‘ متعارف
وزارت مذہبی امور کے مطابق اب تک 362 حج پروازوں کے ذریعے 91 ہزار سرکاری عازمین حج سعودی عرب پہنچ چکے ہیں، جن میں سے 86 ہزار سے زائد مکہ مکرمہ جبکہ 5 ہزار عازمین مدینہ منورہ میں موجود ہیں۔ پرائیویٹ اسکیم کے تحت 26 ہزار پاکستانی عازمین بھی سعودی عرب پہنچ چکے ہیں۔
362 حج پروازوں کے ذریعے اکیانوے ہزار سرکاری عازمین حج سعودی عرب پہنچ گئے
86 ہزار سے زائد عازمین حج مکہ مکرمہ جبکہ 5 ہزار مدینہ منورہ میں موجود
پرائیویٹ سکیم کے 26 ہزار عازمین حج بھی سعودی عرب میں موجود ہیں
حرم ٹرانسپورٹ کے تحت 416 بسیں سفری سہولیات کے لیے مختص@iamabidmalik pic.twitter.com/R26NlnL1Kv— Media Talk (@mediatalk922) May 16, 2026
حج مشن کے مطابق عازمین کی سفری سہولت کے لیے حرم ٹرانسپورٹ کے تحت 416 بسیں مختص کی گئی ہیں، جبکہ حرم کے اطراف میں رہنمائی کے لیے درجنوں حرم گائیڈز تعینات کیے گئے ہیں۔
وزارت نے بتایا کہ 21 مئی تک مزید 106 حج پروازوں کے ذریعے باقی عازمین کرام کو سعودی عرب پہنچایا جائے گا۔ پاکستان حج مشن کے تحت کال سینٹر، گمشدگی و بازیابی، خوراک، رہائش اور ٹرانسپورٹ سمیت مختلف شعبے 24 گھنٹے خدمات انجام دے رہے ہیں۔
مزید پڑھیں: روڈ ٹو مکہ پروجیکٹ: لاہور سے پہلی پرواز کے انتظامات مکمل، حج انتظامات پر اطمینان کا اظہار
عازمین حج کی رہنمائی کے لیے ٹول فری ہیلپ لائن بھی قائم کی گئی ہے۔ مکہ مکرمہ کے لیے 8002450028 جبکہ مدینہ منورہ کے لیے 8002450029 پر رابطہ کیا جا سکتا ہے۔
پاکستان حج میڈیکل مشن کے تحت 367 ڈاکٹرز اور طبی عملہ بھی عازمین حج کو طبی سہولیات فراہم کرنے میں مصروف ہے۔
