قومی کرکٹ ٹیم کے فاسٹ بولر محمد عباس نے پروفیشنل کرکٹ میں ایک ہزار وکٹوں کا سنگ میل عبور کرلیا۔
یہ کارنامہ انہوں نے بنگلہ دیش کے خلاف سلہٹ ٹیسٹ کی پہلی اننگز میں حاصل کیا، جہاں انہوں نے آج 3 وکٹیں حاصل کرکے اپنی مجموعی وکٹوں کی تعداد ایک ہزار تک پہنچا دی۔
اعداد و شمار کے مطابق محمد عباس نے اب تک فرسٹ کلاس کرکٹ میں 884، لسٹ اے میں 84 جبکہ ٹی20 فارمیٹ میں 32 وکٹیں حاصل کی ہیں۔
واضح رہے کہ سلہٹ ٹیسٹ کی پہلی اننگز میں بنگلہ دیش کی ٹیم 278 رنز بنا کر آؤٹ ہوگئی۔
اس اننگز میں محمد عباس نے شاندار بولنگ کا مظاہرہ کرتے ہوئے دونوں اوپنرز محمود الحسن جوئے اور تنزید حسن کو پویلین بھیجا، جبکہ بنگلہ دیشی کپتان نجم الحسن شانتو کی وکٹ بھی ان کے حصے میں آئی۔
36 سالہ فاسٹ بولر محمد عباس یہ سنگ میل عبور کرنے والے پاکستان کے چھٹے تیز گیند باز بن گئے ہیں۔ اس سے قبل یہ اعزاز وسیم اکرم، وقار یونس، عمران خان، محمد عامر اور عمر گل کے حصے میں آ چکا ہے۔
دلچسپ امر یہ ہے کہ بیرون ملک ٹیسٹ کرکٹ میں ان کی اوسط 23.02 رہی ہے، جسے ان بولرز میں بہترین قرار دیا جا رہا ہے جنہوں نے 100 سے زیادہ وکٹیں حاصل کی ہیں۔
اعداد و شمار کے مطابق محمد عباس اب تک 51 ٹیسٹ اننگز میں 109 وکٹیں لے چکے ہیں، جن میں صرف 9 وکٹیں پاکستان کی سرزمین پر حاصل ہوئیں جبکہ باقی تمام وکٹیں انہوں نے غیر ملکی میدانوں میں حاصل کیں۔
گزشتہ میچ میں بھی انہوں نے شاندار بولنگ کا مظاہرہ کرتے ہوئے 6 وکٹیں حاصل کیں اور سیریز کے آغاز سے ہی بنگلہ دیشی بیٹنگ لائن کو دباؤ میں رکھا ہوا ہے۔
