بنگلہ دیش کے دفاعی مشیر بریگیڈیئر جنرل ریٹائرڈ ڈاکٹر شمس الاسلام کا کہنا ہے کہ نارائن گنج ڈاک یارڈ کو جہاز سازی، مرمت اور دیکھ بھال کی صلاحیتوں میں اضافے کے ذریعے ایک جدید اور ترقی یافتہ بحری صنعتی مرکز میں تبدیل کیا جانا چاہیے۔
یہ بھی پڑھیں: بنگلہ دیش میں مالی بحران، مرکزی بینک نے 5 مالیاتی ادارے بند کرنے کا فیصلہ کر لیا
’بحری سلامتی کے استحکام کے لیے مقامی صلاحیت ہماری بنیادی طاقت ہوگی جس کے لیے آپریشنز میں معیاری معیار، بروقت تکمیل، تکنیکی مہارت اور پیشہ ورانہ صلاحیتوں پر خصوصی توجہ دینا ہوگی۔‘
بنگلہ دیش نیوی کے زیر انتظام نارائن گنج ڈاک یارڈ کے دورے کے موقع پر دفاعی مشیر کو ڈاک یارڈ کی مجموعی سرگرمیوں کے بارے میں بریفنگ دی گئی، جس میں جہاز سازی اور مرمت کی صلاحیت، جدید تکنیکی سہولیات، انفراسٹرکچر کی ترقی، پیداواری سرگرمیاں، مینٹیننس سسٹمز اور بنگلہ دیش نیوی کی نگرانی میں جاری مختلف منصوبے شامل تھے۔
دفاعی مشیر نے جدید ٹیکنالوجی کے استعمال، تربیت کے ذریعے ہنر مند افرادی قوت کی تیاری اور مؤثر انتظامی نظام اپنانے کی ضرورت پر بھی زور دیا تاکہ ادارے کی صلاحیتوں کو مزید بہتر بنایا جا سکے۔
مزید پڑھیں: بنگلہ دیش میں خسرہ بے قابو، سینکڑوں بچے لقمہ اجل بن گئے، ہزاروں اسپتال میں داخل
انہوں نے حکام کو ہدایت کی کہ بنگلہ دیش کے دفاعی نظام کو مزید مضبوط بنانے کے لیے مقامی وسائل، مہارت اور ٹیکنالوجی کا زیادہ سے زیادہ استعمال یقینی بنایا جائے۔
بنگلہ دیش نیول حکام نے انہیں اہم تنصیبات، ورکشاپس، پیداواری زونز اور مرمتی مراکز کا بھی دورہ کرایا۔
حکام سے خطاب کرتے ہوئے ڈاکٹر اے کے ایم شمس الاسلام نے قومی سلامتی، بحری مفادات اور بحری قوت کے تحفظ کے لیے مقامی نیول انڈسٹری کی ترقی کو ناگزیر قرار دیا۔
ڈاکٹر شمس الاسلام نے نارائن گنج ڈاک یارڈ کو صرف جہاز سازی اور مرمت کا مرکز نہیں بلکہ ملک کی بحری صلاحیت، دفاعی تیاری اور خود انحصاری کا اہم ستون قرار دیا۔
انہوں نے زور دیا کہ مستقبل کے تمام ترقیاتی منصوبے قومی مفادات سے ہم آہنگ ہونے چاہییں، انہوں نے ڈاک یارڈ کے افسران، انجینئرز، تکنیکی عملے اور ملازمین کی پیشہ ورانہ مہارت اور لگن کو بھی سراہا۔
