اداکارہ مومنہ اقبال کی جانب سے لیگی رکن صوبائی اسمبلی ثاقب چدھڑ پر ہراسگی کے الزامات کے معاملے پر این سی سی آئی اے نے اداکارہ کی درخواست پر قانونی کارروائی شروع کردی۔
اداکارہ کی جانب سے درخواست میں لیگی ایم پی اے ثاقب چدھڑ اور ان کی اہلیہ سمیرا خان کو نامزد کیا گیا ہے۔ ثاقب خان چدھڑ کا تعلق چنیوٹ سے ہے۔
دونوں ملزمان کو 22 مئی بروز جمعہ کو طلب کیا گیا ہے، جبکہ اداکارہ کی درخواست کو ڈائری نمبر الاٹ کردیا گیا ہے۔
اداکارہ مومنہ اقبال نے گزشتہ روز سوشل میڈیا پر ہراسگی کے الزامات سے متعلق ایک پوسٹ بھی شیئر کی تھی۔
اپنی پوسٹ میں اداکارہ کا کہنا تھا کہ متعدد شکایات کے باوجود پولیس، ایف آئی اے اور این سی سی آئی اے کوئی کارروائی نہیں کررہے۔
انہوں نے الزام عائد کیا کہ وزیراعلیٰ پنجاب مریم نواز کے دفتر سے وابستہ لوگ بھی معاملے کو دبانے کی کوشش کررہے ہیں۔
اداکارہ نے اپنی پوسٹ میں کہاکہ اگر یہ معاملہ جاری رہا تو وہ اس حوالے سے پریس کانفرنس کریں گی۔
مومنہ اقبال نے متعلقہ اداروں سے نوٹس لینے اور اپنی فیملی کو تحفظ فراہم کرنے کا مطالبہ بھی کیا تھا۔
