اسلام آباد میں تھانہ پھلگراں پولیس نے بڑی کارروائی کرتے ہوئے بین الصوبائی ڈکیت گینگ کے 4 ارکان کو گرفتار کر لیا ہے۔
ترجمان اسلام آباد پولیس کے مطابق یہ گینگ راہزنی اور دیگر سنگین جرائم کی درجنوں وارداتوں میں اسلام آباد اور پنجاب پولیس کو مطلوب تھا۔
پولیس کے مطابق گرفتار ملزمان سے تھانہ پھلگراں اور بھارہ کہو کے علاقوں سے چھینے گئے لاکھوں روپے مالیت کے موٹرسائیکل اور قیمتی موبائل فون برآمد کیے گئے ہیں۔
یہ بھی پڑھیں: اسلام آباد پولیس کے سابق ایس پی کو سزائے موت سنا دی گئی
کارروائی کے دوران ملزمان سے وارداتوں میں استعمال ہونے والا اسلحہ معہ ایمونیشن بھی برآمد کیا گیا۔
ابتدائی تفتیش میں ملزمان نے تھانہ پھلگراں اور بھارہ کہو کی حدود میں قتل، پیٹرول پمپ ڈکیتی، شاپ رابری اور اسلحہ کے زور پر راہزنی سمیت متعدد وارداتوں کا اعتراف کیا ہے۔
مزید پڑھیں: اسلام آباد پولیس کی کارروائی، اندھے قتل کا ملزم گرفتار
ڈی آئی جی اسلام آباد محمد جواد طارق نے کہا ہے کہ اسلام آباد پولیس منظم اور متحرک گینگ کے خلاف بڑے پیمانے پر کارروائیاں جاری رکھے ہوئے ہے۔
ان کا کہنا تھا کہ شہریوں کے جان و مال کا تحفظ پولیس کی اولین ترجیح ہے اور ایسے جرائم پیشہ عناصر کے خلاف بلاامتیاز کارروائیاں جاری رہیں گی۔
پولیس حکام کے مطابق گرفتار ملزمان سے مزید تفتیش جاری ہے جبکہ ان کے دیگر ساتھیوں کی گرفتاری کے لیے بھی چھاپے مارے جا رہے ہیں۔
