اداکارہ زارا نور عباس نے عیدالاضحیٰ سے قبل قربانی کے جانوروں، خصوصاً بکروں کے ساتھ روا رکھے جانے والے ناروا سلوک پر شدید تشویش کا اظہار کرتے ہوئے عوام سے جانوروں کی فلاح و بہبود کو یقینی بنانے کی اپیل کی ہے۔
زارا نور عباس نے اپنی انسٹاگرام اسٹوری پر ایک ویڈیو شیئر کی جس میں مبینہ طور پر بکرے بیچنے والے افراد جانوروں کو غیر ضروری طور پر زیادہ خوراک کھلا رہے تھے تاکہ وہ زیادہ بڑے اور صحت مند دکھائی دیں۔
View this post on Instagram
اداکارہ نے اپنی اسٹوری میں لکھا کہ ’یہ کئی حوالوں سے غلط ہے۔ اگر آپ کہیں ایسا ہوتے دیکھیں تو اسے روکیں اور دوسروں کو بھی ایسا کرنے سے منع کریں۔ براہِ کرم اس قربانی کو صرف رسم یا مذہبی فریضہ سمجھ کر ادا نہ کریں بلکہ اسے حقیقی معنوں میں بامقصد بنائیں‘۔
سوشل میڈیا صارفین کی بڑی تعداد نے زارا نور عباس کے مؤقف کی حمایت کرتے ہوئے کہا کہ معاشرے میں جانوروں پر ظلم کو معمول سمجھا جانے لگا ہے۔
صارفین کا کہنا تھا کہ بعض بیوپاری زیادہ قیمت حاصل کرنے کے لیے جانوروں کو غیر فطری طریقے سے موٹا کرتے ہیں، حالانکہ جانوروں کی مناسب دیکھ بھال اور متوازن خوراک ہی ان کی صحت کے لیے بہتر ہوتی ہے۔
