امریکی صدر ڈونلڈ ٹرمپ کے بڑے بیٹے ڈونلڈ ٹرمپ جونیئر اس ہفتے کے اختتام پر بہاماس کے ایک نجی جزیرے میں پام بیچ کی سماجی شخصیت بیٹینا اینڈرسن کے ساتھ شادی کی تقریب منعقد کریں گے، تاہم صدر ٹرمپ اس تقریب میں شریک نہیں ہوں گے۔ ذرائع کے مطابق تقریب کو انتہائی نجی اور محدود رکھنے کے لیے مہمانوں کی تعداد بھی بہت کم رکھی گئی ہے۔
سی این این سے گفتگو کرنے والے منصوبے سے واقف 2 ذرائع کے مطابق تقریب کو جان بوجھ کر انتہائی محدود رکھا گیا ہے اور اس میں صرف قریبی خاندان اور منتخب دوست شریک ہوں گے۔ مہمانوں کی مجموعی تعداد 50 سے بھی کم رکھی گئی ہے۔
رپورٹ کے مطابق اس نجی تقریب میں ایک اہم شخصیت شریک نہیں ہوگی، اور وہ ہیں امریکی صدر ڈونلڈ ٹرمپ۔
یہ بھی پڑھیے بیٹے کی شادی میں شرکت کے حوالے سے ڈونلڈ ٹرمپ کا مبہم بیان، میڈیا کو بھی تنقید کا نشانہ بنا دیا
خبر منظر عام پر آنے کے بعد صدر ٹرمپ نے اپنے سوشل میڈیا پلیٹ فارم ’ٹروتھ سوشل‘ پر تصدیق کرتے ہوئے کہا کہ وہ تقریب میں شرکت نہیں کریں گے۔
انہوں نے لکھا، ’میں اپنے بیٹے ڈان جونیئر اور ٹرمپ خاندان کی نئی رکن، ان کی ہونے والی اہلیہ بیٹینا، کے ساتھ ہونا چاہتا تھا، لیکن حکومتی ذمہ داریوں اور امریکا سے محبت کی وجہ سے ایسا ممکن نہیں۔‘
صدر ٹرمپ نے مزید کہا، ’میرے لیے اس اہم وقت میں واشنگٹن ڈی سی میں وائٹ ہاؤس میں موجود رہنا ضروری ہے۔ ڈان اور بیٹینا کو مبارک ہو۔‘
ایک روز قبل اوول آفس میں صحافیوں سے گفتگو کرتے ہوئے بھی ٹرمپ نے شادی میں شرکت سے متعلق غیر واضح مؤقف اختیار کیا تھا۔
یہ بھی پڑھیں: ڈونلڈ ٹرمپ جونیئر نے معروف کاروباری شخصیت بیٹینا اینڈرسن سے منگنی کرلی
انہوں نے کہا تھا، ’وہ چاہتے ہیں کہ میں جاؤں، لیکن یہ ایک چھوٹی اور نجی تقریب ہے، میں کوشش کروں گا کہ شرکت کر سکوں۔‘
بعد ازاں انہوں نے ایران اور دیگر عالمی معاملات کا حوالہ دیتے ہوئے کہا، ’یہ وقت میرے لیے موزوں نہیں۔‘
ذرائع کے مطابق ڈونلڈ ٹرمپ جونیئر اور بیٹینا اینڈرسن ابتدا ہی سے چاہتے تھے کہ شادی کی تفصیلات میڈیا تک نہ پہنچیں تاکہ تقریب مکمل طور پر نجی اور محدود رہے۔ اس فیصلے کا مقصد سیکیورٹی خدشات کم کرنا اور مہمانوں کو صدارتی سیکیورٹی انتظامات سے پیدا ہونے والی مشکلات سے بچانا بھی تھا۔
رپورٹ میں مزید بتایا گیا ہے کہ دونوں نے جمعرات کے روز باضابطہ طور پر شادی کر لی تھی۔ فلوریڈا کے پام بیچ کاؤنٹی میں جمع کرائے گئے ریکارڈز کے مطابق نکاح نامے پر دونوں کے دستخط موجود ہیں جبکہ تقریب کی نظامت بریڈ میکفرسن نے انجام دی۔
ذرائع کا کہنا ہے کہ بہاماس میں ہونے والی تقریب میں ٹرمپ جونیئر کے بہن بھائی شریک ہوں گے۔
یہ ڈونلڈ ٹرمپ جونیئر کی دوسری شادی ہے۔ اس سے قبل وہ وینیسا ٹرمپ کے ساتھ 12 برس تک رشتہ ازدواج میں منسلک رہے، تاہم 2018 میں دونوں میں طلاق ہو گئی تھی۔
وینیسا ٹرمپ نے حال ہی میں اعلان کیا تھا کہ انہیں بریسٹ کینسر کی تشخیص ہوئی ہے۔
ڈونلڈ ٹرمپ جونیئر 2020 سے 2024 تک کمبرلی گلفائل کے ساتھ منگنی میں بھی رہے، جو اس وقت یونان میں امریکی سفیر ہیں اور کیلیفورنیا کے گورنر گیون نیوسم کی سابق اہلیہ بھی رہ چکی ہیں۔
