خیبرپختونخوا کے ضلع بنوں میں پولیس اور سی ٹی ڈی کی جانب سے کیے گئے انٹیلی جنس بیسڈ آپریشن میں 8 خارجی دہشتگرد ہلاک ہوگئے، جبکہ متعدد کے زخمی ہونے کی اطلاعات بھی سامنے آئی ہیں۔
سینٹرل پولیس آفس کے مطابق یہ کارروائی تھانہ میریان کی حدود میں کی گئی، جہاں دہشتگردوں کی موجودگی کی اطلاع پر پولیس اور محکمہ انسداد دہشتگردی نے مشترکہ آپریشن کیا۔
اس دوران دہشتگردوں اور سیکیورٹی اہلکاروں کے درمیان شدید فائرنگ کا تبادلہ ہوا، جس میں ایک پولیس اہلکار شہید جبکہ دوسرا زخمی ہوگیا۔ زخمی اہلکار کو فوری طور پر اسپتال منتقل کر دیا گیا۔
پولیس حکام کا کہنا ہے کہ دہشتگردوں کی نقل و حرکت پر نظر رکھنے کے لیے جدید ڈرونز اور جدید ٹیکنالوجی سے مدد لی گئی۔
کارروائی کے دوران 8 دہشتگرد ہلاک ہوئے جبکہ کئی دیگر زخمی ہوئے۔ آپریشن کے مقام سے 10 کلو وزنی دیسی ساختہ بم بھی برآمد کیا گیا، جسے بم ڈسپوزل ٹیم نے موقع پر ہی ناکارہ بنا دیا۔
دوسری جانب آئی جی پولیس ذوالفقار حمید نے کہا ہے کہ فتنہ الخوارج اور دیگر امن دشمن عناصر کے خلاف کارروائیاں بلا تعطل جاری رہیں گی۔
ان کا کہنا تھا کہ خیبر پختونخوا پولیس عوام کے جان و مال کے تحفظ کے لیے فرنٹ لائن پر موجود ہے اور دشمن کی ہر کارروائی کا بھرپور جواب دیا جائے گا۔
