امریکی وزیرِ خارجہ مارکو روبیو نے امید ظاہر کی ہے کہ ایران جنگ کے خاتمے کے لیے تیار کردہ معاہدے کو آج ہی قبول کر سکتا ہے۔
اپنے دورۂ بھارت کے موقع پر نئی دہلی میں میڈیا کے نمائندوں سے بات چیت کرتے ہوئے انہوں نے کہا کہ یہ ممکن ہے کہ آج، کل یا پھر اگلے چند روز کے اندر ہمارے پاس اس حوالے سے کوئی بڑا اعلان کرنے کے لیے موجود ہو۔
یہ بھی پڑھیں: پاکستان ثالثی میں سرگرم، امید ہےایران سےمعاہدہ ہوجائیگا، امریکی وزیر خارجہ مارکو روبیو
امریکی وزیرِ خارجہ کا کہنا تھا کہ وہ ایران جنگ سے متعلق کسی بھی وقت اچھی خبر سامنے آنے کے لیے پوری طرح پُرامیڈ ہیں۔
مارکو روبیو نے تصدیق کی کہ ایران کے ساتھ جاری سفارتی مذاکرات میں اب تک نمایاں پیشرفت دیکھنے میں آئی ہے۔ یاد رہے کہ اس سے ایک روز قبل سویڈن میں صحافیوں سے گفتگو کرتے ہوئے انہوں نے واضح کیا تھا کہ اس وقت ایران کے ساتھ معاہدے کا طے پانا امریکی حکومت کی اولین ترجیح ہے۔
انہوں نے اس اہم سفارتی مشن میں پاکستان کے کلیدی کردار کا اعتراف کرتے ہوئے بتایا تھا کہ امریکہ اور ایران کے درمیان ہونے والی اس بات چیت میں پاکستان ہی بنیادی ثالث کے فرائض سرانجام دے رہا ہے۔
یہ بھی پڑھیں: ایران امریکا مذاکرات میں پیشرفت، کیا ڈونلڈ ٹرمپ معاہدے کے لیے دباؤ میں ہیں؟
اپنے گزشتہ بیان میں امریکی وزیرِ خارجہ نے یہ بھی کہا تھا کہ وہ پاکستان کے فیلڈ مارشل سید عاصم منیر کے ساتھ مسلسل رابطے میں ہیں اور انہیں قوی امید ہے کہ ایران کے ساتھ یہ ڈیل کامیابی سے ہمکنار ہو جائے گی۔
مارکو روبیو کا یہ تازہ ترین اور اہم ترین بیان ایک ایسے نازک موڑ پر سامنے آیا ہے جب پاکستانی فیلڈ مارشل عاصم منیر ایران کا اپنا اہم ترین دورہ مکمل کر کے تہران سے پاکستان کے لیے روانہ ہوچکے ہیں۔
