امریکی ریاست میساچوسٹس کے تالاب سے خطرناک ایلیگیٹر سنیپنگ کچھوا برآمد ہوا ہے جس نے ماہرین کو حیرت میں ڈال دیا۔
میساچوسٹس میں جنگلی حیات کے حکام کو ایسیکس کاؤنٹی کے ایک تالاب میں ایک غیرمعمولی اور غیرمقامی جانور کی موجودگی کی اطلاع ملی، جس پر کارروائی کرتے ہوئے انہوں نے وہاں سے تقریباً 60 پاؤنڈ وزنی ‘ایلیگیٹر سنیپنگ کچھوا’ پکڑ لیا ہے۔
یہ بھی پڑھیں: دنیا کا سب سے معمر کچھوا زندہ نکلا، سوشل میڈیا پر موت کی خبر جعلی ثابت
میساچوسٹس ڈویژن آف فشریز اینڈ وائلڈ لائف نے سوشل میڈیا پر بتایا کہ مقامی رہائشیوں نے میٹھے پانی کے کچھوؤں کی ماہر حیاتیات ٹرینا وانٹمین سے رابطہ کیا تھا اور یہ شک ظاہر کیا تھا کہ ان کے تالاب میں آنے والا یہ نیا مہمان ایک ایلیگیٹر سنیپنگ کچھوا ہوسکتا ہے۔
واضح رہے کہ کچھوؤں کی یہ نسل لوزیانا سے لے کر جنوب مشرقی آئیووا تک کے گرم پانیوں میں پائی جاتی ہے اور یہ قدرتی طور پر میساچوسٹس کے سرد ماحول میں نہیں رہ سکتے۔
یہ بھی پڑھیں: بھگوڑا کچھوا ساڑھے 3 سال بعد ملا تو کتنا فاصلہ طے کر چکا تھا؟
ماہرین کا کہنا ہے کہ یہ مادہ کچھوا یہاں کے سرد موسم کی وجہ سے شدید مشکلات کا شکار تھی اور اس کی حالت کو دیکھ کر ماہرین حیاتیات کا اندازہ ہے کہ اسے غیر قانونی طور پر پالتو جانور کے طور پر رکھنے کے بعد یہاں تالاب میں کھلا چھوڑ دیا گیا تھا۔
اس مادہ کچھوے کو فوری طور پر نیو انگلینڈ وائلڈ لائف سینٹر منتقل کردیا گیا ہے، جہاں اس وقت نمونیا کے شدید مرض کے لیے اس کا باقاعدہ علاج جاری ہے۔
