سوشل میڈیا پر ایک وائرل اسکیم میں دنیا کے معمر ترین کچھوے جوناتھن کی موت کی جھوٹی خبر پھیلا کر کرپٹو کرنسی عطیات مانگنے کی کوشش کی گئی۔ 194 سالہ کچھوے کے نام سے بنائے گئے جعلی اکاؤنٹ نے دعویٰ کیا کہ وہ سینٹ ہیلینا میں انتقال کرگیا ہے، جسے بعض میڈیا اداروں نے بھی درست خبر سمجھ کر نشر کردیا۔
یہ بھی پڑھیں: دنیا کا معمر ترین کچھوا اپنی 190 ویں سالگرہ
جعلی پوسٹ میں خود کو جوناتھن کا ویٹرنری ڈاکٹر ظاہر کرنے والے شخص نے جذباتی پیغام جاری کیا، تاہم اصل ڈاکٹر جو ہولنز نے وضاحت کی کہ وہ سوشل میڈیا پلیٹ فارم ایکس استعمال ہی نہیں کرتے اور کچھوا مکمل طور پر زندہ ہے۔ انہوں نے کہا کہ جعلی اکاؤنٹ دراصل کرپٹو عطیات حاصل کرنے کی کوشش کررہا تھا۔
جوناتھن سیچلز نسل کا دیوہیکل کچھوا ہے اور دنیا کا سب سے معمر معلوم زمینی جانور سمجھا جاتا ہے، جو 1882 سے سینٹ ہیلینا میں گورنر ہاؤس کے احاطے میں رہ رہا ہے۔
سینٹ ہیلینا کے گورنر نائجل فلپس نے بتایا کہ جھوٹی خبر پھیلنے کے بعد انہیں متعدد پیغامات موصول ہوئے، جس پر انہوں نے خود جا کر کچھوے کو دیکھا جو درخت کے نیچے آرام کر رہا تھا اور بالکل صحت مند تھا۔
یہ بھی پڑھیں: بھگوڑا کچھوا ساڑھے 3 سال بعد ملا تو کتنا فاصلہ طے کر چکا تھا؟
گورنر نے مزاحیہ انداز میں بیان جاری کرتے ہوئے مشہور قول کا حوالہ دیا کہ میری موت کی خبر مبالغہ آرائی تھی۔ عمر رسیدگی کے باوجود جوناتھن کی بینائی کمزور اور سونگھنے کی حس متاثر ہے، مگر وہ اب بھی متحرک ہے اور کیلے شوق سے کھاتا ہے۔
