پاکستان شوبز انڈسٹری میں ہراسانی اور نامناسب رویوں سے متعلق حالیہ تنازع نے نیا رخ اختیار کرلیا ہے۔ اداکارہ مامیا شاہ جعفر کے بیانات کے بعد اب اداکار ارسلان بٹ نے قانونی کارروائی کا اعلان کرتے ہوئے سخت ردعمل دے دیا ہے۔
مامیا شاہ جعفر نے حالیہ انٹرویو میں دعویٰ کیا تھا کہ ایک اداکار نے ان سے نامناسب انداز میں قربت بڑھانے کی کوشش کی۔ ابتدائی طور پر نام کے حوالے سے ابہام پیدا ہوا تاہم بعد میں انہوں نے وضاحت کی کہ وہ اداکار ارسلان خان نہیں بلکہ ارسلان بٹ تھے۔
View this post on Instagram
اداکارہ کے بیان کے بعد سوشل میڈیا پر معاملہ تیزی سے زیر بحث آیا جس پر ارسلان بٹ نے ردعمل دیتے ہوئے اپنی ساکھ کو نقصان پہنچانے کے الزام میں قانونی نوٹس جاری کرنے کا اعلان کیا۔
ارسلان بٹ نے اپنے سوشل میڈیا اکاؤنٹ پر قانونی نوٹس کی تصویر شیئر کرتے ہوئے قرآن پاک کی ایک آیت بھی پوسٹ کی جس کا مفہوم ہے جھوٹ بولنے والوں پر اللہ کی لعنت ہو۔
View this post on Instagram
اداکار نے اپنے بیان میں کہا کہ ان کے خلاف جھوٹے اور ہتک آمیز الزامات لگائے گئے ہیں جن پر قانونی کارروائی کا آغاز کردیا گیا ہے۔ انہوں نے مطالبہ کیا کہ مقررہ وقت میں عوامی معافی مانگی جائے بصورت دیگر ہتکِ عزت اور فوجداری کارروائی سمیت مزید قانونی اقدامات کیے جائیں گے۔
ارسلان بٹ کا کہنا تھا کہ وہ نہ تو شہرت حاصل کرنے کے خواہشمند ہیں اور نہ ہی کسی غیر اخلاقی رویے میں ملوث، جبکہ اس معاملے کے سنگین نتائج برآمد ہوسکتے ہیں۔
