عیدالاضحیٰ کے پرامن اور مذہبی ماحول کے دوران مری کے علاقے بکوٹ کی یونین کونسل پلک میں ایک افسوسناک اور غیر معمولی واقعہ پیش آیا، جہاں قربانی کے لیے لایا گیا ایک بیل اچانک بے قابو ہو کر کھائی میں جا گرا۔ واقعے کی ویڈیو سوشل میڈیا پر وائرل ہو گئی ہے جس کے بعد صارفین کی جانب سے مختلف ردعمل سامنے آ رہے ہیں۔
خدارا قربانی کے جانوروں کو خوفزدہ مت کریں۔ مبینہ طور پر یہ واقع مری کا ہے۔ pic.twitter.com/w45iFxhZcu
— Ahmad Ali Baltistani (@AAliBaltistani) May 27, 2026
میڈیا رپورٹس کے مطابق عید کے موقع پر مری کے علاقے سرکل بکوٹ میں ایک بھاری بھرکم بیل قربانی کے لیے لایا گیا تھا۔ عینی شاہدین کے مطابق جیسے ہی جانور کو گاڑی سے اتارا گیا، وہ اچانک رسی توڑ کر بھاگ نکلا۔
بیل دوڑتا ہوا قریبی مکان کی چھت تک جا پہنچا، تاہم چھت پر حفاظتی دیوار یا جنگلہ نہ ہونے کے باعث اس کا پاؤں پھسل گیا اور وہ سینکڑوں فٹ گہری کھائی میں جا گرا۔
یہ بھی پڑھیں:لگژری فارم ہاؤس! جہاں کروڑوں روپے مالیت کے قربانی کے بیل رہتے ہیں
حادثے کے بعد بیل شدید زخمی ہو گیا۔ جانور کی حالت بگڑتے دیکھ کر مالکان اور مقامی افراد نے فوری فیصلہ کرتے ہوئے اسے موقع پر ہی ذبح کر دیا تاکہ اس کی تکلیف کم کی جا سکے۔
واقعے کی ویڈیو بعد ازاں سوشل میڈیا پر تیزی سے وائرل ہو گئی، جس پر صارفین نے افسوس اور حیرت کا اظہار کیا۔ ویڈیو میں جانور کے بے قابو ہونے اور گرنے کے مناظر دیکھے جا سکتے ہیں، جس نے آن لائن پلیٹ فارمز پر بحث کو جنم دیا ہے۔
یہ بھی پڑھیں:کراچی میں چلتی گاڑی سے بکرا چوری، حیران کن واردات کی ویڈیو وائرل
واضح رہے کہ ملک بھر میں عیدالاضحیٰ مذہبی جوش و جذبے کے ساتھ منائی جا رہی ہے اور نمازِ عید کے بعد قربانی کا سلسلہ جاری ہے۔ مختلف شہروں میں اجتماعات میں ملک و قوم کی سلامتی اور خوشحالی کے لیے خصوصی دعائیں بھی کی جا رہی ہیں۔
