پنجاب کے علاقے فتح جنگ میں قائم ایک منفرد اور شاہانہ فارم ہاؤس دیکھنے والوں کو حیران کر دیتا ہے۔ پہلی نظر میں یہ فارم ہاؤس کسی ارب پتی شخصیت کی رہائش گاہ محسوس ہوتا ہے، تاہم قریب جا کر معلوم ہوتا ہے کہ یہ پرتعیش اور جدید سہولیات سے آراستہ فارم دراصل قربانی کے بیلوں کے شوق کے لیے تعمیر کیا گیا ہے، جہاں کروڑوں روپے مالیت کے اعلیٰ نسل کے بیل موجود ہیں۔
اس فارم ہاؤس کے مالک فرخ شاہد کا کہنا ہے کہ ان کا مقصد پاکستان کی مقامی اور بہترین نسلوں، خصوصاً ‘دھنی’ اور ‘فتح جنگی’ نسل کے جانوروں کو فروغ دینا ہے۔ اسی جذبے کے تحت انہوں نے ایک ایسا جدید فارم قائم کیا جہاں جانوروں کی دیکھ بھال اعلیٰ معیار کے مطابق کی جاتی ہے اور انہیں آرام دہ ماحول فراہم کیا جاتا ہے۔
فارم میں برہمن، فتح جنگی اور دیگر اعلیٰ نسل کے بیل موجود ہیں، جن میں سے بعض کی قیمت کروڑوں روپے تک بتائی جاتی ہے۔ فارم کی خاص بات یہ ہے کہ یہاں جانوروں کی خوراک، صفائی، صحت اور آرام کا خصوصی خیال رکھا جاتا ہے، جس کے باعث یہ فارم علاقے میں منفرد حیثیت اختیار کر چکا ہے۔
فرخ شاہد کے مطابق فارم میں موجود بڑے اور نایاب جانور خصوصاً عیدالاضحیٰ کے موقع پر فروخت کیے جاتے ہیں، جنہیں خریدنے والوں میں معروف شخصیات بھی شامل رہی ہیں۔
اسٹار کرکٹر حارث رؤف بھی اس فارم سے قربانی کے لیے جانور خرید چکے ہیں، جبکہ مختلف سیاسی شخصیات بھی یہاں سے اعلیٰ نسل کے جانور خریدتی رہی ہیں۔
فارم مالک کا کہنا ہے کہ جانوروں کی خدمت اور بہتر نسلوں کے فروغ کو وہ اپنا مشن سمجھتے ہیں، یہی وجہ ہے کہ اس فارم کو جدید طرز پر استوار کیا گیا تاکہ پاکستان کی مقامی نسلوں کو عالمی معیار کے مطابق متعارف کرایا جا سکے۔
