لاہور ہائیکورٹ نے درست ویزا، ٹکٹ اور دیگر سفری دستاویزات رکھنے والے مسافر کو آف لوڈ کرنے کے اقدام کو غیرقانونی قرار دیتے ہوئے ایف آئی اے کی کارروائی کالعدم قرار دے دی۔ عدالت نے قرار دیا کہ بیرون ملک سفر ہر شہری کا آئینی حق ہے اور کسی بھی مسافر کو محض خدشات کی بنیاد پر سفر سے نہیں روکا جا سکتا۔
یہ بھی پڑھیں:ایئرپورٹس پر مسافروں کو آف لوڈ کرنے کا معاملہ، لاہور ہائیکورٹ نے بڑا حکم جاری کردیا
میڈیا رپورٹس کے مطابق لاہور ہائیکورٹ میں اس کیس کی سماعت جسٹس راحیل کامران نے کی، جس کے بعد 9 صفحات پر مشتمل تفصیلی فیصلہ جاری کیا گیا۔ عدالت نے نائجیریا جانے والے شہری کو روکنے کے ایف آئی اے اقدام کو غیرقانونی قرار دیتے ہوئے کہا کہ درخواست گزار کسی مقدمے، انکوائری، بلیک لسٹ یا ای سی ایل میں شامل نہیں تھا۔
عدالتی فیصلے میں کہا گیا کہ درخواست گزار کے مطابق بورڈنگ کارڈ جاری ہونے کے بعد اچانک اسے آف لوڈ کیا گیا اور صرف اس خدشے پر سفر سے روکا گیا کہ شاید وہ دبئی سے واپس نہ آئے۔ عدالت نے قرار دیا کہ اس اقدام سے شہری کو مالی نقصان، ذہنی اذیت اور بدنامی کا سامنا کرنا پڑا۔
لاہور ہائیکورٹ نے اپنے فیصلے میں کہا کہ ایف آئی اے کو اختیارات ضرور حاصل ہیں، تاہم یہ اختیارات لامحدود نہیں۔ عدالت نے مسافروں کو آف لوڈ کرنے سے متعلق نئی گائیڈ لائنز بھی جاری کیں۔
یہ بھی پڑھیں:ڈرائیونگ لائسنس نہ رکھنے پر آف لوڈ ہونیوالا مسافر بالآخر سعودی عرب کیسے پہنچا؟
فیصلے کے مطابق آئندہ کسی بھی مسافر کو آف لوڈ کرتے وقت متعلقہ افسران کو واضح، تفصیلی اور بامعنی وجوہات تحریری طور پر دینا ہوں گی، جبکہ مسافر سے کیے گئے سوالات اور ان کے جوابات کا مکمل ریکارڈ بھی محفوظ رکھا جائے گا۔
