قومی اسمبلی میں اپوزیشن لیڈر اور پشتونخوا ملی عوامی پارٹی کے چیئرمین محمود خان اچکزئی کے خلاف چمن میں جلسہ عام کے دوران حکومت مخالف تقریر کرنے پر مقدمہ درج کر لیا گیا ہے۔
پولیس کے مطابق محمود خان اچکزئی نے 29 مئی کو چمن میں منعقدہ ایک عوامی جلسے سے خطاب کیا تھا، جس میں انہوں نے بلوچستان میں دہشتگردی اور ٹرکوں کو نذرِ آتش کیے جانے کے واقعات کو روکنے میں ناکامی پر حکومت کو شدید تنقید کا نشانہ بنایا۔
پولیس کا کہنا ہے کہ اپوزیشن لیڈر نے اپنی تقریر کے دوران امن و امان کے قیام میں ناکامی پر سیکیورٹی اداروں پر بھی تنقید کی تھی۔
پولیس کے مطابق مقدمہ تحصیل گلستان کے رہائشی ولی خان غیبیزئی کی درخواست پر درج کیا گیا ہے۔
پولیس کا کہنا ہے کہ تھانہ چمن میں درج مقدمے میں مختلف قانونی دفعات شامل کی گئی ہیں، جبکہ مزید کارروائی قانون کے مطابق عمل میں لائی جا رہی ہے۔
